Շաբաթ, 13. 04. 2024

spot_img

Է. Նալպանտեանը ԵԱՀԿ ԽՎ Նախագահին Ներկայացուցած է Ատրպէյճանի Կողմէ Արցախի Դէմ Սանձազերծուած Յարձակման Գործողութիւններուն Հետեւանքները

Մայիս 3-ին Հայաստանի Արտաքի Գործոց նախարար Էտուարտ Նալպանտեան Հելսինքիի մէջ հանդիպած է ԵԱՀԿ խորհրդարանական վեհաժողովի (ԽՎ) նախագահ Իլգա Գաներուայի հետ։ Այս մասին կը տեղեկացնէ ՀՀ ԱԳ նախարարութեան հասարակայնութեան հետ կապերու բաժինը:

Էտուարտ Նալպանտեանը ԵԱՀԿ խորհրդարանական վեհաժողովի նախագահին ներկայացուցած է Ազրպէյճանի կողմէ Արցախի դէմ սանձազերծուած յարձակման հետեւանքները, անոնց յաղթահարման ուղղութեամբ Հայաստանի եւ ԵԱՀԿ Մինսքի խումբի համանախագահներուն ջանքերը:

Հայաստանի ԱԳՆ ղեկավարը ԵԱՀԿ ԽՎ նախագահի ուշադրութիւնը հրաւիրած է՝ Ազրպէյճանի զինուած ուժերուն կողմէ միջազգային մարդասիրական իրաւունքի կոպտագոյն խախտումներուն վրայ: Նախարարը աւելցուցած է, որ Ազրպէյճանը կը շարունակէ արհամարհել հրադադարը յարգելու մասին միջազգային հանրութեան կոչերը, ոտնահարել 1994-1995ի զինադադարի հաստատման եւ ամրապնդման մասին եռակողմ անժամկէտ համաձայնագիրերը:

Այս առումով Իլգա Գաներուան նշած է, որ ուժի կիրառումը անընդունելի է եւ աւելցուցած, որ ԵԱՀԿ խորհրդարանական վեհաժողովը ամբողջովին կը սատարէ միջնորդութեան միջազգային իրաւագիր ունեցող Մինսքի խումբի եռանախագահներուն ջանքերը` ուղղուած բանակցութիւններու միջոցով ղարաբաղեան հիմնախնդիրի խաղաղ կարգաւորման եւ ԵԱՀԿ գործող նախագահի անձնական ներկայացուցիչի խումբի կարողութիւններու ընդլայնման:

Զրուցակիցները քննարկած են ԵԱՀԿ օրակարգային շարք մը հարցեր:

 

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին