*ՍԵՒԱԿ ՅԱԿՈԲԵԱՆ*
Աւանդականօրէն Հայոց Ցեղասպանութեան ոգեկոչումները ընդհանրապէս եղած են համահայկական ու միակամ ոգիով եւ գործելաձեւով ու կազմակերպութեամբ , որ հպարտառիթ երեւոյթ է ու վայել մեր ժողովուրդի անմեղ նահատակներու սուրբ յիշատակին:
Սակայն հակառակ այս եւ տարբեր առիթներով՝ Հայ ժողովուրդի բաղկացուցիչ տարրերու եւ կազմակերպութիւններու միասնականութեան ձգտող լոզունգներուն ու յայտարարութիւններուն, շատ չեն առիթները ուր վերոյիշեալ ձգտումը կը դրսեւորուի գործնական օրինակներով:
Հիմա, որ աւարտած են Ցեղասպանութեան նուիրուած ձեռնարկներուն մեծամասնութիւնը եւ սփիւռքահայ կեանքը մտած է իր բնականոն հունը՝ փափաքս է, որ անցնող օրերուն միասնական երեւոյթով տեղի ունեցած ձեռնարկները շարունակեն կատարուիլ այլ առիթներով եւս ու բեմերէն արտասանուած լոզունգները՝ մշակութային թէ քաղաքական մեր կեանքին մէջ դառնան իրական ու շօշափելի, որուն այնքան կը կարօտի ու կը գնահատէ Հայ ժողովուրդի լուռ մեծամասնութիւնը…:
Լաւատեսութեամբ լի բարի օր մը քեզի սիրելի ընթերցող:
