Հայոց Ցեղասպանութեան 101-րդ տարելիցի ոգեկոչման արարողութիւններ տեղի պիտի ունենան նաեւ Սթամպուլի մէջ: Այս մասին կը հաղորդէ Armenpress.am-ը։
Նախորդ տարիներուն նման այս տարի եւս, թրքական «Ոչ ըսէ ռասիզմին եւ խտրականութեան» կազմակերպութիւնը նախաձեռնած է շարք մը ձեռնարկներ:
Ապրիլ 22-ին Ճեզայիր սրահի մէջ տեղի պիտի ունենայ մամուլի ասուլիս, ուր պիտի ներկայացուին ոգեկոչման արարողութիւնները եւ պիտի դատապարտուի հայերու դէմ օսմանեան Թուրքիոյ մէջ իրականացած ոճրագործութիւնը:
Ապրիլ 24-ին Շիշլիի հայկական գերեզմանատան մէջ, Թուրքիոյ ժամանակով 15:30-ին պիտի ոգեկոչուի, թրքական բանակին մէջ ցեղային խտրականութեան եւ ատելութեան ենթահողով սպաննուած հայ զինուոր Սեւակ Պալըքճըի յիշատակը:
Աւելի ուշ` 19:15-ին Սթամպուլի կեդրոնական Իսթիքլալ պողոտայի վրայ պիտի կայանայ ոգեկոչման գլխաւոր արարողութիւնը:
