Չեխիոյ հայ համայնքը պիտի դիմէ Եւրոպական Միութեան վերանայելու իր մօտեցումը եւ 1915 թուականին Օսմանեան Թուրքիոյ կողմէ հայերու նկատմամբ իրականացուցած ցեղասպանութեան տալու արժանի գնահատական:
Այս մասին «Արմէնփրես»-ի հետ զրոյցի ընթացքին նշած է՝ «Ուրարտու» հայ-չեխական միութեան նախագահ Ալեքսանդր Սարգսեան:
Չեխիոյ մէջ կը գործէ «Ապրիլ 24 կոմիտէ», որ արդէն շուրջ 5 տարիէ կը համակարգէ Ապրիլ 24-ի ծրագիրները: Այս տարի որոշուած է, որ ապրիլքսանչորսեան ձեռնարկները պիտի սկսին Ապրիլ 22-ին, պիտի շարունակուին 23-ին եւ պիտի եզրափակուին 24-ին: Մեկնարկը պիտի տրուի Ապրիլ 22-ին Եիհլաւա քաղաքին մէջ: Այնտեղ տեղադրուած է խաչքար, ուր հայ համայնքի ներկայացուցիչները ծաղիկներ պիտի խոնարհեն, ծաղկեպսակ պիտի դնեն` յարգելով Հայոց Ցեղասպանութեան անմեղ զոհերուն յիշատակը: Այնուհետեւ տեղի Սուրբ Հոգի եղեկեցւոյ մէջ պիտի մատուցուի պատարագ եւ մոմավառութիւն: Ձեռնարկներ տեղի պիտի ունենան Ապրիլ 23-ին Պռնօ քաղաքին մէջ:
Ապրիլ 24-ին մայրաքաղաք Փրակի հայկական եկեղեցւոյ մէջ պիտի մատուցուի պատարագ, ծաղկեպսակ պիտի դրուի Ֆրանց Վերֆելի յուշաքարին մօտ, ապա հայ համայնքի ներկայացուցիչները երթով պիտի երթան Փրակի մէջ տեղադրուած խաչքարի մօտ:
«Մեր գլխաւոր ուղերձը այն է, որ Հայոց Ցեղասպանութենէն 101 տարիներ անց ոչինչ մոռացուած է: Հայ ազգը պահանջատէր է, 101 տարիները ոչ թէ վերջն են, այլ նոր գործի սկզբ», ըսած է Ալեքսանտր Սարգսեան: Անոր տեղեկացմամբ նամակ պիտի փոխանցեն Չեխիոյ մէջ Թուրքիոյ դեսպանատան, ինչպէս նաեւ պիտի դիմեն Եւրոպական Միութեան գրասենեակ՝ վերանայելու իր մօտեցումը եւ ճիշդ գնահատական տալու անցեալին մէջ կատարուածին: Ալեքսանտր Սարգսեան ընդգծած է, որ յանցագործը պէտք է պատժուի:
