Պաշտպանութեան նախարարութիւնը կը վերահաստատէ, որ Ապրիլ 10-ին Կարմիր խաչի միջազգային կոմիտէի եւ ԵԱՀԿ գործող նախագահի անձնական ներկայացուցիչի գրասենեակի միջնորդութեամբ, Լեռնային Ղարաբաղի եւ Ազրպէյճանի միջեւ տեղի ունեցած է Ապրիլ 2-էն 5 ազրպէյճանական կողմի սանձազերծած յարձակումի ընթացքին զոհուած զինծառայողներու դիակներու փոխանակում:
Փոխանակման ընթացքին հայկական կողմին փոխանցուած է ԼՂՀ Պաշտպանութեան բանակի զոհուած 18 զինծառայողներուն մարմինները:
Նախարարութեան մամուլի ծառայութենէն կը յայտնեն, որ հաշուի առնելով հայկական կողմին փոխանցուած մարմիններու խոշտանգման եւ անարգանքի փաստը, որ արձանագրուած է ԼՂՀ պատկան մարմիններու եւ ԿԽՄԿ ներկայացուցիչներու կողմէ, ՀՀ պաշտպանութեան նախարարութիւնը կը յայտարարէ, որ ատիկա կը հանդիսանայ միջազգային մարդասիրական իրաւունքի կանոններուն` ԼՂՀ ռազմագերիներու, պատանդներու եւ անյայտ կորածներու հարցերով զբաղող պետական յանձնաժողովին կողմէ մատնանշուած կանոններու կոպտագոյն խախտում:
ԼՂՀ եւ ՀՀ իշխանութիւնները համագործակցելով միջազգային կազմակերպութիւններու հետ, կ՛իրականացնեն յանցագործութիւններուն վերաբերեալ ապացոյցներու հաւաքման աշխատանքներ, որոնց հիման վրայ կը յարուցուին քրէական գործեր:
ՀՀ պաշտպանութեան նախարարութիւնը պաշտօնապէս կը յայտարարէ նաեւ, որ բոլոր միջազգային ատեաններու մէջ հետեւողականօրէն պիտի բարձրացուին Ազրպէյճանի կողմէ իրականացած միջազգային մարդասիրական (զինուած հակամարտութեան) իրաւունքի եւ տարատեսակ համաձայնագիրներու խախտումներու փաստերը` վերջնանպատակ դնելով Ազրպէյճանին նաեւ իրաւական պատասխանատուութեան ենթարկելու հարցը:
