Շաբաթ, 13. 04. 2024

spot_img

Թ.Մ.Մ. «Մհեր Մկրտչեան» Թատերախումբը Հայաստանի Մէջ Կը Ներկայացնէ «Ոտքի՛ Դատարանն Է Գալիս»

*ՅԱԿՈԲ ՎԱՐԴԻՎԱՌԵԱՆ*

Յանդուգն նախաձեռնութիւն մը եւս ԹՄՄ Մեծագոյն Նիւ Եորքի «Մհեր Մկրտչեան» թատերախումբին համար. հիւրախաղերով բարձրանալ հայրենի բեմ ու ներկայացնել Պերճ Զէյթունցեանի «Ոտքի՛ Դատարանն է Գալիս» ներկայացումը, բեմադրութեամբ փարիզաբնակ արուեստագէտ Ժիրայր Բաբազեանի: Այս մէկը թատերախումբին երկրորդ այցելութիւնն է Հայաստան. առաջինը՝ Հոկտեմբեր 2007ին:

Ցեղասպանութեան տարեդարձի ապրիլեան ու նաեւ՝ Ղարաբաղեան մեր Հայրենի եզերքին ճգնաժամային նախայարձակման այս օրերուն, այս քայլը թէքէեանականներու զօրակցութիւնն է մեր հայրենի ժողովուրդին՝ ներկայացնելու Թալաաթի սպանութիւնը վրիժառու հայ երիտասարդ Սողոմոն Թէհլիրեանի կողմէ, վերյիշեցնեու բոլորին, թէ անպատիժ պիտի չմնան բոլոր անոնք, որոնք անարդարօրէն եղան պատճառ Հայկական մեծ ողբերգութեան, ինչպէս անցեալին, նաեւ այսօր:

Հայրենասիրական ոգիին բարձր գիտակցութեամբ Նիւ Եորքի մկրտչեանականները կու գան Հայաստան, կու գան անգամ մը եւս հաղորդուելու մայր հողով, Հայրենիքով, Սարտարապատով, Ծիծեռնակաբերդով ու Մայր Աթոռ Սուրբ Էջմիածինով:  Անոնք կու գան Հայաստան, ինչպէս տասնամեակներ ամբողջ Թէքէեանի հիմնադիրները այցելեցին Հայրենիք, վերանորոգելու իրենց ուխտը ծառայելու մեր ժողովուրդին, մշակոյթին ու ազգային ժառանգութեանց:  Այս մեր տղաքը ժառանգորդներն են անմահանուն Վահան Թէքէեանի, Արշակ Չօպանեանի ու Միհրան Տամատեանի, որոնք եղան օրինակները իրա՛ւ հայրենասիրութեան  ու այդ ըրին իրենց կեանքի բովանդակ տարիներուն անխտիր:  Որովհետեւ հայրենասիրութիւնը չի ճանչնար գաղափարախօսութիւն, քաղաքական վարդապետութիւն կամ հատուածական քարոզչութիւն:

Ֆրունզիկ՝ Մհեր Մկրտչեան երեք տասնամեակներ առաջ այցելած ըլլալով Նիւ Եորք, իր հայրենաշունչ դրօշմն էր, որ դրած էր մեր թատերախումբի հիմնադիր անդամներուն վրայ:  Անոնք պիտի գան Կոմիտասի այգին՝ խոնարհելու մեծ վարպետի շիրիմին ու ըսելու. «Վարպե՛տ, պիտի շարունակենք ծառայել մեր 3000ամեայ թատրոնի աւանդութիւններուն, գուցէ հեռաւոր Ատլանտեանի այս ափերէն»:

Ներկայացումները տեղի պիտի ունենան Ապրիլ 13ին, Երեւանի Խաչատուր Աբովեանի անուան Մանկավարժական Համալսարանի բեմին վրայ, ուր պիտի տրուի առաջին ներկայացումը, նախաձեռնութեամբ Համալսարանի Տնօրէն Փրոֆ. Ռուբէն Միրզախանեանի. հրաւիրուած պիտի ըլլան թատերագիրներ, թատրոնի գործիչներ, քննադատներ ու թատերական հիմնարկներու ուսանողներ:  Ապրիլ 14ին, ժամը 18:00ին Կիւմրիի (ծննդավայրը Մհեր Մկրտչեանի) «Վարդան Աճէմեան»ի անուան Պետական Դրամատիկական Թատրոնին մէջ եւ Ապրիլ 16ին, ժամը 19:00ին դարձեալ Երեւանի «Յակոբ Պարոնեան»ի անուան Երաժշտական Քոմետիայի Թատրոնին մէջ:

Հիւրախաղերու այս ծրագիրին հովանաւորութիւնը ստանձնած է ՀՀ Վարչապետ Յովիկ Աբրահամեան:  Բացի Պարոն Վարչապետէն ներկայ պիտի ըլլան նաեւ այլ պետական դէմքեր, ինչպէս Մշակոյթի եւ Սփիւռքի նախարարները՝ Յասմիկ Պօղոսեանն ու Հրանոյշ Յակոբեանը եւ այլ բարձրաստիճան անձնաւորութիւններ ու զինուորականներ:

Մեր տղաքը պիտի վերադառնան վերանորոգուած հայրենասիրութեամբ ու յաւերժական Արարատի տեսիլքով ջերմացնելու նիւ եորքահայութեան ազգային զգացումները:

Բարի երթ ու բարի վերադարձ:

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին