Շաբաթ, 13. 04. 2024

spot_img

Ֆութպոլի Հոլանտացի Առասպել Եոհան Քրույֆ Ոչ Եւս Է

*ԶՕՀՐԱՊ ՏԷՕՔՄԷՃԵԱՆ*

Հինգշաբթի, 24 Մարտ 2016ին, շիջեցաւ ֆութպոլի հոլանտացի առասպել Եոհան Քրույֆը, 69 տարեկան հասակին: Անուանի ֆութպոլիստը անբուժելի հիւանդութենէ կը տառապէր ժամանակէ մը ի վեր:

Եոհան Քրույֆ ծնած էր 25 Ապրիլ 1947ին, Հոլանտայի մայրաքաղաք Ամսթերտամի մէջ: Հռչակ ստացած էր իր երկիրի անուանի ակումբներէն Աժաքս Ամսթերտամի շարքերէն խաղալով, ուր ճանչցուած էր «թռչող հոլանտացին» անունով:

Քսաներորդ դարու ֆութպոլի պատմութեան լաւագոյն խաղացողներէն Քրույֆ, մէկէ աւելի տիտղոսներ շահած է անհատական մարզի մէջ, մանաւանդ լաւագոյն ֆութպոլիստի ոսկեայ գնդակին տիրանալով յաջորդաբար երեք տարիներ՝ 1971ին, 1972ին եւ 1973ին:

Աժաքսի կողքին (1964-1973), հանդէս եկած է սպանական Պարսելոնայի (1973-1978), Լոս Անճելըսի Ազթեքսի (1979-1980), ամերիկեան Ուաշինկթըն Տիփլոմացի (1980-1981), սպանական Լեւանթէի (1981), դարձեալ Աժաքսի (1981-1983) եւ հոլանտական Ֆէյենուրտի (1983-1984) շարքերէն: Մօտ 20 տարուան ընթացքին, 1964-1984, վերոյիշեալ ակումբներուն հետ կատարած է 706 մրցումներ, որոնց  ընթացքին նշանակած է 395 կոլեր:

Իր երկիրի՝ Հոլանտայի ազգային խումբին հետ խաղցած է շուրջ 12 տարի՝ 1966-1977: Հաւաքականին հետ կատարած է 48 մրցումներ եւ նշանակած 33 կոլեր: Հոլանտայի ազգային խումբին հետ աչքի ինկած է 1974ին Արեւմտեան Գերմանիոյ մէջ տեղի ունեցած Մոնտիալին, ուր աչքառու խաղ եւ բացառիկ արդիւնքներ արձանագրած է՝ յատկապէս 1970ի բաժակակիր Պրազիլի հաւաքականին դէմ, պարտութեան մատնելով զայն: 1974ի աւարտական մրցումը Արեւմտեան Գերմանիոյ դէմ, յիշատակելի կը մնայ ֆութպոլասէրներու միտքին մէջ, սակայն Քրույֆի խումբը պարտուեցաւ 2-1 արդիւնքով:

Իբրեւ մարզիչ գլխաւորած է երեք խումբեր՝ Ամսթերտամի Աժաքսը (1985-1988), Սպանիոյ Պարսելոնան (1988-1996) եւ Քաթալոնիան (2009-2013), ընդհանրապէս յաջողութեան հասնելով:

Քրույֆին անունը միշտ յարգուած է իր համակիրներուն թէ այլոց կողմէ Հոլանտայի, Եւրոպայի եւ Աշխարհի մէջ:

Ֆութպոլի աշխարհը կորսնցուց Եոհան Քրույֆը՝ «թռչող հոլանտացին», հոլանտական եւ միջազգային ֆութպոլի աստղերէն ու առասպելական խաղցողներէն մէկը:

 

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին