Արցախի գորգագործութեան, խեցեգործութեան եւ ժողովրդական արուեստի այլ ուղղութիւններ ներկայացնող նմոյշներ, ամփոփուած են մէկ ցուցահանդէսի մէջ: «Արմէնփրես»ի հաղորդած տեղեկութիւններով, Յովհաննէս Շարամբէյեանի անուան ժողովրդական ստեղծագործութեան կեդրոնին մէջ բացումը կատարուած է՝ «Արցախի տեքորաթիւ–կիրառական արուեստը» խորագիրով ցուցահանդէսին:
Բացման օրը տեղի ունեցած է նաեւ բանասիրական գիտութիւններու դոկտոր Արմէն Սարգսեանի «Արցախի բանահիւսութիւնը» գիրքի շնորհահանդէսը, որու ընթացքին խաղիկներու ձեւով ներկայացուած են պատառիկներ Արցախի բանահիւսութենէն, հնչած են ժողովրդական երգեր, ցուցադրուած է Արցախի այցեքարտերէն մէկուն՝ «Ժենգեալով հաց»ի պատրաստութեան գործընթացը ներկայացնող ժապաւէն:
Ձեռնարկը կազմակերպած էին Հայաստանի եւ Արցախի մշակոյթի նախարարութիւնները: Ժամանակաւոր ցուցահանդէսը Յովհ. Շարամբէյեանի անուան ժողովրդական ստեղծագործութեան կեդրոնին մէջ բաց պիտի մնայ մինչեւ Մարտ 30։
