Երկուշաբթի, 17. 06. 2024

spot_img

«Վերամտածել Քաղաքացիական Առողջ Դաստիարակութեան Մասին» Նիւթով Սեմինար Հայկազեան Համալսարանէն Ներս

Հովանաւորութեամբ եւ ներկայութեամբ Լիբանանի Կրթական Նախարարութեան ընդհանուր տնօրէն Պրն․ Ֆատի Եարաքի, Հայկազեան Համալսարանի Մանկավարժութեան բաժանմունքը կազմակերպած էր սեմինար մը՝ «Վերամտածել Քաղաքացիական Առողջ Դաստիարակութեան Մասին» նիւթով։ Սեմինարը տեղի ունեցաւ համալսարանի հանդիսասրահէն ներս Հինգշաբթի, 17 Մարտ 2016ին, ներկայութեամբ Լիբանանի մէջ Ամերիկեան դեսպանատան, Լիբանանի կենսոլորտի եւ արդարադատութեան նախարարութիւններու ներկայացուցիչներուն, ինչպէս նաեւ կրթական կազմակերպութիւններու եւ հաստատութիւններու տնօրէններու, ներկայացուցիչներու, համալսարանական դասախօսներու եւ ուսանողներու։

Սոյն սեմինարը կազմակերպուած էր Canadian Journal of Science, Mathematics and Technology Education հանդէսի յատուկ թիւի հրապարակման առիթով։ Յատուկ թիւը կ՛արծարծէ վերոնշեալ նիւթը եւ անոր խմբագիրներն են՝ Դոկտ․ Յակոբ Ա․Եագուպեան եւ Դոկտ․ Ճէս Պազուլ։

Սեմինարի բացումը կատարեց եւ բարի գալուստի խօսքը փոխանցեց՝ Հայկազեան Համալսարանի Արուեստից եւ Գիտութեանց բաժանմունքի տեսուչ Դոկտ․ Արտա Էքմեքճի, որ անդրադարձաւ կրթական համակարգերը որակական վերատեսութեան ենթարկելու անհրաժեշտութեան՝ ի նպաստ առողջ անհատներու կազմաւորման։ Այս ծիրէն ներս Դոկտ․Էքմեքճի ի մասնաւորի շեշտեց՝ քաղաքացիական կրթութեան վերապահուած դերի կարեւորութիւնը՝ փայլուն ապագայի կերտման ի խնդիր;

Իր խօսքին մէջ Ֆատի Եարաք անդրադարձաւ կրթական նախարարութեան ունեցած որոշիչ դերին՝ տիպար քաղաքացիներ պատրաստելու գործընթացին մէջ, եւ ընկերութեան մէջ անոնց գործօն մասնակցութիւնը ապահովելու գծով։

Սեմինարը վարեց Հայկազեան համալսարանի դասախօս Շաղիկ Գանտահարեան – Խիւտավերտեան։ Յաջորդաբար խօսք առին Պէյրութի Ամերիկեան համալսարանի Մանկավարժութեան բաժանմունքի դասախօս Դոկտ․Սաումա Պուժաուտէ, Գանատայի Ռէճայնա համալսարանի Մանկավարժութեան բաժանմունքի դասախօս Դոկտ․ Ճէս Պազուլ, եւ Հայկազեան համալսարանի Մանկավարժութեան բաժանմունքի վարիչ Դոկտ․ Յակոբ Եագուպեան։ Դոկտ․ Պուժաուտէ ներկայացուց վերոնշեալ հանդէսի յատուկ թիւը եւ փոխանցեց իր վերլուծական նկատողութիւնները անոր վերաբերեալ։ Դոկտ․ Պազուլ ներկայացուց հանդէսի յատուկ թիւէն բխած կիրառական առաջարկներ՝ կրթական համակարգերու եւ դաստիարակութեան մարզին վերաբերող։ Իսկ Դոկտ․ Եագուպեան խօսեցաւ տուեալ հանդէսի թիւէն բխած կիրառական առաջարկներու մասին՝ կրթական քաղաքականութիւններու մշակման ոլորտէն ներս։

Սեմինարի յաջորդ օրը նոյն թեմայով վարժողական աշխատանքային հանդիպում մը տեղի ունեցաւ, մասնակցութեամբ լիբանանեան վարժարաններէ ուսուցիչներու, դասանիւթերու համակարգողներու եւ համալսարանի ուսանողներու։ Աշխատանքային հանդիպումը վարեց Դոկտ․ Ճէս Պազուլ։

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին