2015 թուականին Լեռնային Ղարաբաղ այցելած են 16.5 հազար օտարերկրեայ զբօսաշրջիկներ: Այս մասին ըստ News.am-ի, Մարտ 21-ին Երեւանի մէջ լրագրողներուն յայտնած է ԼՂՀ տնտեսութեան փոխնախարար Սերկէյ Շահվերդեան:
Անոր խօսքով քանի մը տարի շարունակ այդ այցելութիւններուն թիւը տարեկան 30-40 տոկոսով կ՛աճէր: 2014 թուականին այդ աճը դանդաղած էր մինչեւ 13 տոկոս, սակայն 2015-ին ցուցանիշը նորէն աճած է: «Իսկ եթէ խօսինք Հայաստանի Հանրապետութենէն եւ Սփիւռքէն ժամանող զբօսաշրջիկներուն մասին, ապա այդ թիւը շատ աւելի մեծ է», ըսած է Շահվերդեան:
Արտասահմանեան երկիրներէն Արցախ կը ժամանեն հիմնականօրէն Ռուսիայէն, այցելուներուն մեծ մասը ծագումով հայեր են: Երկրորդ տեղը ԱՄՆ-ն է, յետոյ եւրոպական երկիրներն են:
