Աշխատանքային այցով Պելճիքայի Թագաւորութիւն մեկնած ՀՀ նախագահ Սերժ Սարգսեան, Պրիւքսէլի մէջ կը մասնակցի Եւրոպական ժողովրդական կուսակցութեան (ԵԺԿ) գագաթաժողովին, որ կը վարէ ԵԺԿ նախագահ Ժոզէֆ Տոլը:
ՀՀ նախագահի աշխատակազմի հասարակայնութեան եւ տեղեկատուութեան միջոցներու հետ կապերու վարչութեան հաղորդած տեղեկութիւններով` գագաթաժողովին կը մասնակցին Եւրոպական խորհուրդի եւ Եւրոպական յանձնաժողովի նախագահներ Տոնալտ Դուսգն ու Ժան-Քլոտ Իւնգերը, ԵՄ անդամ եւ Արեւելեան գործընկեր երկիրներէն ԵԺԿ-ին անդամակցող կուսակցութիւնները ներկայացնող պետութիւններու եւ կառավարութիւններու ղեկավարները:
Կը նախատեսուի, որ գագաթաժողովի մասնակիցները քննարկեն տնտեսական առկայ խնդիրներն ու զարգացման հեռանկարները, անդրադառնան միջազգային արդի մարտահրաւէրներուն, ներառեալ սուրիական ճգնաժամին, Եւրոպայի մէջ լուրջ մարտահրաւէր դարձած փախստականներու խնդիրներուն, Եւրոպական Միութեան՝ ԵՄ անդամ պետութիւններու մէջ քաղաքական իրավիճակին եւ ԵՄ հարեւանութեան քաղաքականութեան վերաբերող հարցերուն:
