ԵԱՀԿ գործող նախագահի անձնական ներկայացուցիչ Անճէյ Քասփրչիկ, Լեռնային Ղարաբաղի հակամարտութեան կողմերուն կոչ ուղղած է խստօրէն հետեւելու հրադադարին` խուսափելով Զատիկի ու Նովրուզի նախաշեմին այնպիսի գործողութիւններէ, որոնք պատճառ կ՛ըլլան լարուածութեան աճին, կը հաղորդէ «Թերթ» լրատուական կայքը:
ԵԱՀԿ-ի կայքին մէջ տեղադրուած հաղորդագրութեան մէջ կը նշուի, որ Քասփրչիկ մշտադիտարկում իրականացուցած է հայ-ազրպէյճանական զօրքերու շփման գիծին վրայ:
«Կողմերը ինծի տեղեկացուցած են սահմանին վրայ տեղի ունեցած վերջին դէպքերուն մասին, եւ ես լսած եմ անոնց բողոքները: Կողմերը ընդգծած են, որ զօրքերու շփման գիծին վրայ գիւղերը մօտ տեղակայուած են: Սահմանամերձ գօտիներու բնակիչները լրջօրէն կը տուժեն հրադադարի խախտումներէն», ըսած է ան:
Ան շնորհաւորած է տարածաշրջանի բոլոր բնակիչները յառաջիկայ տօներուն առիթով եւ կոչ ուղղած է այդ ընթացքին խուսափելու հրադադարի խախտումներէ:
«Յառաջիկայ Նովրուզի եւ Զատիկի տօները հաշուի առնելով` ես կողմերուն կոչ կ՛ուղղեմ պահպանելու հրադադարն ու խուսափելու այնպիսի գործողութիւններէ, որոնք կրնան պատճառ դառնալ շփման գիծի վրայ կամ սահմանի լարուածութեան աճին», ըսած է ան:
