Գաղութային այլ հանդիպումներու կողքին, Հայկական Բարեգործական Ընդհանուր Միութեան Լիբանանի Կեդրոնական Գրասենեակի համադրումով՝ Հայաստանի Ամերիկեան Համալսարանի Նախագահ Դոկտ. Արմէն Տէր Կիւրեղեան եւ Փոխ-նախագահ Պրն. Աշոտ Ղազարեան, հանդիպում ունեցան հայկական երկրորդական վարժարաններու 10-րդ, 11-րդ եւ 12-րդ դասարաններու աշակերտներուն հետ՝ բարձրագոյն ուսման կողմնորոշման նպատակով:
Տպայէ, Անթիլիաս, Զալքա եւ Ֆանար շրջաններու վարժարաններու աշակերտներուն հետ տեսակցութիւնը դիւրացնելու համար, բարձրագոյն ուսման կողմնորոշման առաջին հաւաքը տեղի ունեցաւ Չորեքշաբթի, 16 Մարտ 2016-ին կ.ա. ժամը 11:30-ին, Հայկական Բարեգործական Ընդհանուր Միութեան Ե. եւ Ա. Տեմիրճեան Կեդրոնէն ներս: Սոյն հաւաքին իրենց մասնակցութիւնը բերին Ազգային Եղիշէ Մանուկեան Գոլէճը, Համազգայինի Մ. եւ Հ. Արսլանեան Ճեմարանը, Հայ Կաթողիկէ Պատրիարքարանի Ս. Խաչ Հարպոյեան Բարձրագոյն վարժարանը եւ Հ.Բ.Ը.Միութեան Դարուհի-Յովակիմեան Երկրորդական Վարժարանը:
Հայաստանի Ամերիկեան Համալսարանի պատասխանատուները այս առիթով աշակերտներուն փոխանցեցին արձանագրութեան, մասնագիտութիւններու, դասանիւթերու, կրթաթոշակի եւ կրթանպաստի վերաբերեալ անհրաժեշտ տեղեկութիւններ:
Հ.Բ.Ը.Մ. Լիբանան
