Հայոց Ցեղասպանութեան ոգեկոչման Լոս Անճելըսի միացեալ մարմինը, որ կազմուած է Լոս Անճելըսի հայ գաղութին մէջ գործօն դերակատարութիւն ունեցող շուրջ 50 միութիւններէ եւ կազմակերպութիւններէ, իբրեւ հիմնական առաքելութիւն՝ պարտականութիւնն ունի կազմակերպելու Մոնթեպելլոյի «Պիքնըլ Փարք»էն ներս գտնուող Հայոց Ցեղասպանութեան յուշարձանին առջեւ տեղի ունենալիք տարեկան ոգեկոչումը: Իսկ ամբողջ տարուան ընթացքին կը կազմակերպէ եւ կը հովանաւորէ նաեւ Հայոց Ցեղասպանութեան հետ առնչուող քարոզչական բնոյթի տարբեր միջոցառումներ:
Նկատի ունենալով, որ այս տարի Ցեղասպանութեան 101-րդ ամեակին առիթով Լոս Անճելըսի թրքական հիւպատոսարանին առջեւ, համագաղութային տարողութեամբ կազմակերպուելիք «Արդարութեան Համախմբում»ը տեղի պիտի ունենայ Ապրիլ 24-ին, կէսօրէն ետք ժամը 1-էն սկսեալ, Մոնթեպելլոյի Հայոց Ցեղասպանութեան յուշարձանին առջեւ կայանալիք համագաղութային ոգեկոչումը տեղի պիտի ունենայ Շաբաթ, 23 Ապրիլ 2016-ին, կէսօրէն ետք ժամը 1ին: Միջոցառման ընթացքին պիտի կատարուի կրօնական արարողութիւն եւ պիտի փոխանցուին քաղաքական պատգամներ։
Հայոց Ցեղասպանութեան 101-րդ տարին ոգեկոչելու նպատակով, Միացեալ մարմինը նախաձեռնած է նաեւ այլ ձեռնարկներու, որոնց մասին պիտի անդրադառնանք այլ հաղորդագրութեամբ:
Հայոց Ցեղասպանութեան ոգեկոչման Լոս Անճելըսի միացեալ մարմինը սոյն հաղորդագրութեամբ կոչ կ՛ուղղէ շրջանի բոլոր հայորդիներուն, որ Շաբաթ, Ապրիլ 23-ին խուռներամ ներկայ գտնուին ոգեկոչման՝ յարգելու համար մեր 1.5 միլիոն սրբադասուած նահատակներուն յիշատակը, ինչպէս նաեւ մասնակցութիւն բերեն գաղութէն ներս կազմակերպուող եւ Եղեռնին նուիրուած բոլոր միջոցառումներուն: Այն կազմակերպութիւնները, որոնք կը փափաքին կապուիլ Միացեալ մարմինին հետ, թող հաճին գրել գործադիր մարմինի secretary@uacla.com հասցէին:
ՀԱՅՈՑ ՑԵՂԱՍՊԱՆՈՒԹԵԱՆ ՈԳԵԿՈՉՄԱՆ
ԼՈՍ ԱՆՃԵԼԸՍԻ ՄԻԱՑԵԱԼ ՄԱՐՄԻՆ
