ԱՄՆ-ի մէջ հրատարակուած է Մասաչուսէցի արհեստաբանութեան հիմնարկի (MIT) դասախօս, պատմաբան Լեռնա Էքմէքչիօղլուի «Հայաստանի վերականգնումը. Պատկանելիութեան սահմանափակումները Թուրքիոյ մէջ Ցեղասպանութենէն ետք» գիրքը:
Սթենֆորտի համալսարանի կողմէ հրատարակուած գիրքը, հեղինակի խորքային հետազօտութիւնն է Հայոց Ցեղասպանութեան հետեւանքներուն եւ ատկէ ետք Թուրքիա մնացած հայերուն մասին:
Հեղինակը կ’անդրադառնայ Առաջին աշխարհամարտէն ետք Թուրքիոյ մէջ հայերու վիճակին` նկարագրելով, թէ այդ երկիրին մէջ ինչպէս հայերուն կը վերաբերին որպէս դաւաճաններու:
Աշխատութեան մէջ հեղինակը կը պատմէ այդ ժամանակաշրջանի Թուրքիոյ մէջ գործող՝ հայկական շրջանակներու հանրային գործիչներու մասին, ինչպէս Սթամպուլի մէջ տպագրուող «Հայ կին» ամսագիրի խմբագիր Հայկանոյշ Մարքը: Ան կը մարմնաւորէ հայ կնոջ կերպարը, որ բարդ ժամանակաշրջանի մէջ առանցքային դեր կը խաղայ հայ մշակոյթի, ինքնութեան եւ աւանդոյթներու պահպանման գործին մէջ:
Հայկանոյշ Մարքը հանդէս կու գար նաեւ ի պաշտպանութիւն կանանց իրաւունքներու: Այսպիսով հեղինակը փորձած է ներկայացնել այդ ժամանակաշրջանի հայ կանանց դերակատարութիւնը՝ Թուրքիոյ մէջ հայկական ինքնութեան պահպանման գործին մէջ:
Ըլլալով հայ Լեռնա Էքմէքչիօղլուն կ’ընդգծէ, որ ներկայիս Թուրքիոյ մէջ իրեն պէս բազմաթիւ հայերու չեն թոյլատրեր դասաւանդել դպրոցներու մէջ` ազգային պատկանելիութեան պատճառով:
«Այն պատմութիւնը, զոր կը դասաւանդէին դպրոցին մէջ, ամբողջութեամբ կը հակասէր այն պատմութեան, որուն մասին ինծի կը պատմէին տունը: Ես մեծցած եմ ընտանիքի մը մէջ, ուր կը խօսէին այդ դէպքերուն մասին եւ ջանքեր կը գործադրէին` արթուն պահելու մեր յիշողութիւնը», mediamax.am-ի փոխանցմամբ կը նշէ հեղինակը:
Հեղինակը նաեւ ըսած է, որ Հայոց Ցեղասպանութեան 100-րդ տարելիցէն ետք, Թուրքիոյ մէջ աննախադէպ քննարկումներ կը ծաւալին կատարուածի եւ այդ երկիրին մէջ հայերու ներկայութեան մասին:
