Երեքշաբթի, 23. 04. 2024

spot_img

Ֆրանսայի Վալանս Քաղաքին Մէջ Սումկայիթի Զոհերու Յիշատակին Հոգեհանգստեան Կարգ Կատարուեցաւ

Ֆրանսայի Վալանս քաղաքին մէջ, «Ապրիլ 24» յանձնաժողովին նախաձեռնութեամբ, Սուրբ Սահակ հայկական եկեղեցւոյ մէջ սումկայիթեան ողբերգութեան զոհերու յիշատակի հոգեհանգստեան կարգ կատարուած է: Այս մասին կը հաղորդէ Nouvelles d’Armenie-ն։

«Ապրիլ 24» յանձնաժողովի անդամները իրենց յայտարարութեամբ նշած են, որ այդ քայլով նպատակ ունին մէկ անգամ եւս յիշելու եւ յիշեցնելու՝ 1988 Փետրուար 26-28ին Պաքուի եւ Սումկայիթի մէջ տեղի ունեցած ողբերգութիւններու հարիւրաւոր հայ զոհերուն մասին:

«Սումկայիթի միջոցով Ազրպէյճանը կ՛ուզէր ճնշել Լեռնային Ղարաբաղի հայութիւնը, որ արտայայտած էր Հայաստանին միանալու իր կամքը: Հայերու սպանդին միջոցով Պաքուն ցոյց տուաւ իր իրական բնոյթը՝ փորձելով արեամբ զսպել Լեռնային Ղարաբաղի հայ բնակչութեան ազատ ապրելու ցանկութիւնը: Այսօր Ազրպէյճանը կրկին կը շարունակէ այդ ռասիստական, հակահայկական ատելութեան քաղաքականութիւնը եւ արհամարհելով 1994-ի Մայիսի հրադադարը՝ կը հրետակոծէ սահմանամերձ հայկական գիւղերը», նշուած է յանձնաժողովի տարածած յայտարարութեան մէջ:

«Ապրիլ 24» յանձնաժողովի անդամները խստօրէն դատապարտած են Ազրպէյճանի կողմէ միջազգային իրաւունքի կոպտագոյն խախտումները եւ վերահաստատած աջակցութիւնը Լեռնային Ղարաբաղի ժողովուրդի ազատ ապրելու որոշման վերաբերեալ: Անոնք միջազգային կառոյցներուն սթափութեան եւ Լեռնային Ղարաբաղի ժողովուրդի իրաւունքներու պաշտպանութեան կոչ ուղղած են:

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին