Օրհնութեամբ Ն.Ս.Օ.Տ.Տ. Գարեգին Բ Ամենայն Հայոց Կաթողիկոսի, Փետրուար 28-ին Մայր Աթոռ Սուրբ Էջմիածինի «Ռուբէն Սեւակ» թանգարանին մէջ, տեղի ունեցած է ոգեկոչման հանդէս նուիրուած նահատակ բանաստեղծ Ռուբէն Սեւակի յիշատակին: Այս մասին կը յայտնեն Մայր Աթոռի տեղեկատուական համակարգէն:
Բացման խօսքով հանդէս եկած է թանգարանի տնօրէն Արժանապատիւ Տ. Սեւակ քահանայ Սարիբէկեանը:
Այնուհետեւ ցուցադրուած է «Շողակաթ» հեռուստաընկերութեան կողմէ նկարահանուած ֆիլմը` նուիրուած Ռուբէն Սեւակի կեանքին եւ նահատակութեան պատմութեան:
«Ռուբէն Սեւակ առեղծուածային բանաստեղծը» խորագիրը կրող բանախօսութեամբ հանդէս եկած է գրականագէտ, ՀՀ Սփիւռքի փոխնախարար Սերժ Սրապիոնեան:
Ցերեկոյթի ընթացքին ՀՀ վաստակաւոր արուեստագէտ Սիլվա Եուզպաշեանի կատարումով հնչած են Ռ. Սեւակի, Դանիէլ Վարուժանի, Սիամանթոյի, Մեծարենցի եւ Ուիլիամ Սարոյեանի ստեղծագործութիւններէն:
Հանդէսի երաժշտական բաժինով ելոյթ ունեցած են «Հայաստանի նոր անուններ» ծրագիրի պատանի երաժիշտները:
Ոգեկոչման հանդէսը եզրափակուած է Մայր Աթոռի Քրիստոնէական դաստիարակութեան կեդրոնի տնօրէն՝ Գերաշնորհ Տ. Վարդան եպիսկոպոս Նաւասարդեանի օրհնութեան խօսքով:
