Հայոց Ցեղասպանութեան 100-րդ տարելիցին նուիրուած «Ամէն» նախագիծը Իտալիոյ մէջ պիտի ներկայացուի Օգոստոս 15-ին եւ 16-ին: «Արմէնփրես»ի հետ զրոյցի ընթացքին այս մասին տեղեկացուց՝ Ալ. Սպենդիարեանի անուան օփերայի եւ պալէի ազգային ակադեմական թատրոնի պալեթմայսթեր Ռուտոլֆ Խառատեան` անդրադառնալով նախորդ տարի յետաձգուած ձեռնարկին:
«Ամէն»ը պիտի ներկայացուի Իտալիոյ Արէնա տի Վերոնա դահլիճին մէջ: Լաւագոյն խումբերը եւ բեմադրողները այդ դահլիճին մէջ վախնալով ելոյթ կ’ունենան: Նախագիծին շուրջ պիտի հաւաքուին համաշխարհային աստղեր եւ կատարողներ: Ամբողջ ներկայացման մէջ կարմիր գիծով պէտք է անցնի հայոց պատմութիւնը», նշեց Ռուտոլֆ Խառատեան:
ՀՀ ժողովրդական արուեստագէտին խօսքով` ներկայացումը ինք պիտի բեմադրէ: «Շատ պատասխանատու է` ինչպէս ներկայացնել Հայաստանը, որ ճանչնան քեզ: Մանրակրկիտ աշխատանք է: Մենք աշխարհին բան ունինք ցոյց տալու», շեշտեց ան աւելցնելով, որ նախորդ տարի Վերոնայի մէջ տեխնիկական խնդիրներ եղած են, այդ իսկ պատճառով ներկայացման անդրանիկ ելոյթը յետաձգուած է:
«Ամէն»ը կը ներկայացնէ հայ ժողովուրդը, անոր ծագման, ճակատագիրի պատմութիւնը: Նախագիծին նպատակն է ցոյց տալ, որ Հայաստան հակառակ բոլոր դժուարութիւններուն ու կորուստներուն, կը շարունակէ ըլլալ ծաղկող, երջանիկ եւ ստեղծարար երկիր:
Իրադարձութեան պիտի մասնակցին Neue Philharmonie Hamburg-ը, «Հովեր» քամերային երգչախումբը, օփերայի արուեստագէտներ Յասմիկ Պապեան, Մարիօ Ֆրանգուլիս, Փլասիտօ Տոմինկօ կրտսերը, Բարսեղ Թումանեան, Ճուլիէթ Գալստեան, Ռոզի Անոյշ Սվազլեան եւ այլք:
