Փետրուար 22-ին ՀՀ Սփիւռքի նախարար Հրանոյշ Յակոբեան ընդունեց՝ Գալուստ Կիւլպէնկեան հիմնարկութեան հայկական համայնքներու բաժանմունքի տնօրէն Ռազմիկ Փանոսեանը:
Ողջունելով հիւրը նախարար Հրանոյշ Յակոբեան երախտագիտութիւն յայտնեց Կիւլպէնկեան հիմնարկութեան տնօրինութեան` նախարարութեան հետ համագործակցելու եւ մասնաւորաբար երեք կարեւոր ծրագիրներու` Հայաստանի բարձրագոյն ուսումնական հաստատութիւններուն մէջ ուսանող սուրիահայերու ուսման վարձավճարի տրամադրման, նախարարութեան «Սփիւռք» ամառնային դպրոց ծրագիրի իրականացման, ինչպէս նաեւ երիտասարդներու «Ապագայ» խորագիրով համաժողովի կայացման աջակցութիւն ցուցաբերելու համար:
Փոխադարձաբար շնորհակալութիւն յայտնելով Սփիւռքի նախարարին` պարոն Փանոսեան Կիւլպէնկեան հիմնարկութեան անունով հաւաստիացուց, որ պատրաստակամ են համագործակցելու հայապահպանութեան նպաստող այլ ծրագիրներու իրականացման աշխատանքներուն:
Զրոյցի ընթացքին քննարկուեցան սուրիահայութեան հիմնախնդիրներու լուծման, նախարարութեան «Ամառնային դպրոցի» գործունէութեան շարունակականութեան ապահովման եւ հայագիտութեան զարգացման առնչուող հարցերուն համագործակցելու հնարաւորութիւնները, ինչպէս նաեւ Կիւլպէնկեան հաստատութեան հիմնադրման 60-ամեակը Հայրենիքի մէջ պատշաճ կերպով նշելու առնչուող հարցեր:
