Փետրուար 24-ին Գերմանիոյ դաշնային խորհրդարանին մէջ պիտի քննարկուի Հայոց Ցեղասպանութեան ճանաչման խնդիրը: Թրքական «Gerçekgündem.com» լրատուակայքի տեղեկացմամբ` Ցեղասպանութեան վերաբերեալ նախագիծերը ներկայացուցած են Գերմանիոյ խորհրդարանի «Ձախեր»ու (“Die Linke”) եւ «Կանաչներ»ու (“Die Grüne”) կուսակցութիւնները: Փետրուար 24-ին խորհրդարանական քննարկումներու ժամանակ, այդ նախագիծերու քննարկման համար պիտի տրամադրուի 38 վայրկեան, կը գրէ ermenihaber.am-ը:
Յիշեցնենք, որ անցեալ տարի Գերմանիոյ դաշնային խորհրդարանը Օսմանեան կայսրութեան մէջ հայերու զանգուածային կոտորածները բնութագրած էր որպէս Ցեղասպանութիւն: Թեմային առնչութեամբ համատեղ օրինագիծ մշակելու նպատակով, իշխանութիւնն ու ընդդիմութիւնը որոշում կայացուցած էին` նախագիծերը Արտաքին յարաբերութիւններու եւ մարդու իրաւունքներու յանձնաժողովին փոխանցելու:
Գերմանիոյ խորհրդարանի նախագահ Նորպերթ Լամերթ 2015ի Մարտին հետեւեալ յայտարարութիւնը ըրած էր. «Օսմանեան կայսրութեան մէջ առաջին համաշխարհային պատերազմի ժամանակ՝ ամբողջ աշխարհի աչքին առջեւ տեղի ուենցածը Ցեղասպանութիւն էր: Եւ ան 20-րդ դարու վերջին Ցեղասպանութիւնը չէր»:
Իսկ «Կանաչներ»ու կուսակցութեան համանախագահ Ճեմ Օզտեմիր յիշեցնելով, որ հայոց զանգուածային ջարդերը Ցեղասպանութիւն որակած են թէ՛ Գերմանիոյ նախագահը եւ թէ խորհրդարանի նախագահը, նշած է. «Անհրաժեշտ է, որ ամէն մէկը ձեռքը իր խիղճին դնէ ու հարցնէ` եթէ այդ մարդիկ չմեռնէին, ինչպէ՞ս պիտի ըլլար այսօրուան Թուրքիան: Այսինքն եթէ հայերը, ասորիները եւ յոյները ապրէին, Թուրքիան բազմամշակոյթ ըլլար, շա՞տ վատ կ՛ըլլար: Ո՛չ ընդհակառակը, այս առումով Թուրքիան շատ բան կորսնցուցած է»:
«Ցեղասպանութիւն իրականացուցած երիտթուրքերը Սարիղամիշի մէջ թուրք զինուորներ ալ ոչնչացուցած են: Երիտթուրքերը կործանած են Օսմանեան կայսրութիւնը: Հետեւաբար անոնց պաշտպանելը անիմաստ է: Իւրաքանչիւրը պէտք է հարցնէ ինքիրեն, թէ որմէ կը ցանկայ օրինակ վերցնել», աւելցուցած է ան:
