Թեհրան Թիֆլիսի հետ բանակցութիւններ կը վարէ Հայաստանի տարածքով 200 միլիոն խմ. կազ մատակարարելու վերաբերեալ: Այս մասին, ըստ Panorama.am-ի, յայտարարած է Իրանի պետական կազի ընկերութեան ղեկավար Ալի Ռեզու Քամելի:
«Վրաստանի հետ ձեռք բերուած պայմանաւորուածութեան համաձայն, մենք պէտք է կազը առաքենք մինչեւ Հայաստանի սահման, իսկ Վրաստան իր սահմանին վրայ կազը պիտի ստանայ Հայաստանէն», յայտարարած է Քամելին` ընդգծելով, որ Վրաստան դեռ պէտք է թոյլտուութիւն ստանայ Հայաստանէն` հարեւան երկիրի տարածքով կազի տարանցման համար:
Քամելիի խօսքով կազի առաքումը նպատակ ունի բաւարարել Վրաստանի ներքին պահանջարկը եւ դէպի Եւրոպա տարանցման նպատակ չի հետապնդեր:
«Նոր պայմանագիրը պիտի ստորագրուի 7 ամիսով ու հիմք պիտի ծառայէ այդ ոլորտին մէջ համագործակցութեան յետագայ ընդլայնման համար: Եթէ հաստատուի գործարքի տնտեսական նպատակայարմարութիւնը, յետագային խօսք կրնայ ըլլալ Վրաստան կազի մատակարարման միջնաժամկէտ ու երկարաժամկէտ պայմանագիրներու մասին», յայտնած է Քամելին:
