*ՍԵՒԱԿ ՅԱԿՈԲԵԱՆ*
Շաբաթավերջին Հալէպի ընդհանուր իրավիճակը դարձեալ լարուած էր: Հայորդի մը դարձեալ զոհ գնաց այնտեղ տեղի ունեցող պատերազմի մը, որ Հալէպահայ գաղութին չի վերաբերիր:
Հակառակ հակասական լուրերուն՝ ինչ կը վերաբերի Սուրիոյ արհաւիրքին, դէպքերու զարգացումները՝ Ռուսիոյ միջամտութիւնը, հոն ցամաքային ուժեր ղրկելու Սէուտական Արաբիոյ յուշումը, Արաբական թերակղզիի հիւսիսային բաժինին մէջ՝ ռազմական փորձերու պիտակին տակ տեղի ունեցող զինուորական հսկայական եռուզերը, դժբախտաբար մօտս այն տպաւորութիւնը կը ձգեն, թէ Սուրիոյ պատերազմը ոչ թէ իր աւարտին մօտեցած է, այլ նոր եւ բուռն թափով պիտի վերսկսի…:
Փափաքս է, որ յոռետեսութիւնս սխալ դուրս գայ եւ ալ չզոհուի ոչ մէկ անմեղ մանուկ կամ քաղաքացի… ոչ մէկ Հայորդի:
