Սուրիահայերու Հիմնախնդիրները Համակարգող Կեդրոն հասարակական կազմակերպութեան նախագահ Լենա Հալաճեան կը գրէ.
Հեռախօսս զնգաց:
Միւս ծայրը «Սուրիոյ Հայ Օգնութեան Հիմնադրամ»ի (SARF) ատենապետ Պրն. Ճոն Թիթիզեանն է.
– Բարեւ Լենա… բարեկամներէս Պետրոս Ղազարեանը մահացաւ: Ննջեցեալին հարազատներուն ցանկութիւնը այն է, թէ փոխան ծաղկեպսակի հանգանակուած ինն հազար տոլար գումարը յատկացուի՝ Սուրիոյ պատերազմի հետեւանքով Հայաստան տեղափոխուած Սուրիահայ կարիքաւոր ընտանիքներուն, ձեր կազմակերպութեան կը վստահիմ այս պարտականութիւնը:
Պահ մը կարկամեցայ, առաջ ցաւակցութի՞ւն յայտնէի, թէ շնորհակալութիւն, այս տխուր բայց միաժամանակ ուրախ լուրը լսելուս համար:
Պատշաճութիւնը կատարելէ ետք հիացմունքը պատեց զիս: Հիացմու՛նք ողբացեալի հարազատներուն հոգիի վեհանձնութեա՜ն նկատմամբ, վեհանձնութիւն, զոր կարող է վիշտը բարեգործութեամբ ամոքել, ու հազարաւոր մղոններ հեռաւորութեան վրայ գտնուելով հանդերձ կարեկցիլ տեղահանուած ազգակիցներուն:
Տօնական օրերու նախաշեմին, սոյն գումարով կեդրոնս հնարաւորութիւն ունեցաւ՝ 400 սուրիահայ ընտանիքներու տասը տեսականի պարունակող պարենային զամբիւղներով ապահովել, ինչպէս նաեւ 21 ընտանիքներ անհրաժեշտ կենցաղային պարագաներով օժտել եւ 3 ընտանիքներու բնակարանը տօնածառերով զարդարել:
Հիացմունքիս չափ ալ մեծ էր հոգեկան բաւարարութիւնս, լսելով օգտուողներուն աղօթքն ու ամանօրեայ բարեմաղթութիւնները՝ առ ողբեցեալի հարազատներն ու կազմակերպիչները:
Թող կարեկցանքի ջերմութենէն բխող ամէն մէկ ցաւակցական խօսք, իբրեւ անթառամ ծաղկեպսակ զարդարէ հանգուցեալին շիրիմն ու համբերութիւն պարգեւէ անոր հարազատներուն:
Գուցէ եւ օրինակը դառնայ վարակիչ:
«Հայերն Այսօր»
