Սուրիահայ վարժարաններու աշակերտները ստացան առաջին կիսամեայի իրենց վիճակացոյցները։ Տնօրէնութեանց կողմէ գնահատանքի արժանացան առաջնակարգ եւ հայերէնի մէջ գերազանց աշակերտները, կը գրէ Հալէպի «Գանձասար» շաբաթաթերթը։
Պատերազմական ծանր պայմաններու մէջ, սուրիահայ վարժարանները կը շարունակեն ուսում եւ հայեցի կրթութիւն ջամբել հայ աշակերտութեան։ Ազգային Քարէն Եփփէ Ճեմարանի տնօրէն Յակոբ Քիլէճեան ծնողներու հետ հանդիպման ընթացքին յայտնեց, որ պատերազմը իր բացասական անդրադարձը ունեցաւ ու կը շարունակէ ունենալ աշակերտներու տրամադրութեան, ուսումնական կեանքին եւ կեդրոնացման վրայ։ Կենցաղային դժուարութիւններն ու հրթիռակոծումները յոգնաբեկ դարձուցին բոլորը՝ աշակերտ ըլլան թէ ծնողք, այնուամենայնիւ վարժարան-ծնողք-աշակերտութիւն գործակցութեամբ հնարաւոր եղաւ՝ յաղթահարել ուսումնակրթական դժուարութիւնները։
