Հինգշաբթի, 25. 04. 2024

spot_img

«Սփիւռքի Ներգրաւման Ռազմավարութիւնները» Թեմայով Դասախօսութիւն ՀՀ Սփիւռքի Նախարարութենէն Ներս

Եւրոպական Միութեան նիւթական աջակցութեամբ եւ ՄԱԿի մանկական հիմնադրամի, ՀՀ Սփիւռքի նախարարութեան ու «Առաքելութիւն Արեւելք» կազմակերպութեան նախաձեռնութեամբ՝  Փետրուար 2ին ՀՀ Սփիւռքի նախարարութեան աշխատակազմին համար իրականացած է՝ «Սփիւռքի ներգրաւման ռազմավարութիւնները» թեմայով դասախօսութիւն: Բանախօսը եղած է իրլանտական Diaspora Matters (Սփիւռքի Հարցեր) կազմակերպութեան գործադիր տնօրէն Քինկսլի Այքինսը: Այս մասին կը հաղորդէ ՀՀ Սփիւռքի նախարարութեան մամուլի գրասենեակը։

ՀՀ Սփիւռքի նախարար Հրանոյշ Յակոբեան ողջունած է հիւրը եւ շնորհակալութիւն յայտնած ՄԱԿ-ի մանկական հիմնադրամի հայաստանեան գրասենեակին` դասախօսութիւնը կազմակերպելու եւ իրականացնելու համար: Նախարարը նշած է, որ Իրլանտայէն հրաւիրուած դասախօսը միջազգային կարգի փորձագէտ է: Անոր ղեկավարած կազմակերպութիւնը խորհրդատուական ընկերութիւն է եւ կ՝ուղղորդէ կառավարութիւններ, կառոյցներ ու անհատներ սփիւռքներու վերաբերեալ հարցերուն մէջ: «Կը կարծեմ, որ անոր փորձը, դիտարկումներն ու հետազօտութիւները կրնան օգտակար ըլլալ նաեւ մեզի համար», նշած է նախարարը:

Քինկսլի Այքինսը ներկայացուցած է Իրլանտայի տնտեսութեան եւ գործարարութեան ոլորտին մէջ Սփիւռքի ներգրաւուածութեան բացառիկ ձեւաչափը: Ան նշած է յաջողութեան հասնելու կարեւոր գործօնները, Սփիւռքի նախաձեռնութիւններու ձախողման պատճառները, մարտահրաւէրներու եւ թերութիւններու հնարաւոր դրսեւորումները: Կարեւոր համարուած է այլ երկիրներու կողմէ Սփիւռքի խնդիրներու ուսումնասիրութիւնը, յատկապէս տնտեսութեան եւ գործարարութեան զարգացումը, աշխատատեղերու ստեղծումը:

Այքինսը կարեւոր համարած է ցանցային կապերու ստեղծումը, վստահութեան ամրապնդումը, Սփիւռքը լսելը, ճկունութիւնը, յստակ ուղղորդուած ռազմավարութիւնը: Ան նշած է, որ յաջողութեան հասնելու համար անհրաժեշտ է յաջորդ սերունդի`  երիտասարդութեան հետ աշխատանքը, անոր ներգրաւուածութիւնը ծրագիրներու մէջ եւ տարեցներու հետ աշխատանքի յատուկ ռազմավարութիւնը: Անոր համոզմունքով Սփիւռքի խնդիրները կը դառնան շատ աւելի կարեւոր պետութիւններու եւ կառավարութիւններու համար: «Իւրաքանչիւր երկիր ունի Սփիւռքի դրամագլուխ տարբեր մակարդակներու վրայ, որ կազմուած է մարդոցմէ, ցանցերէ, կապերէ, ֆինանսներէ ու գաղափարներէ», նշած է Քինկսլի Այքինսը:

Բոլոր հարցերը ամփոփուած են աշխոյժ քննարկումներով ու հետաքրքրական առաջարկներով, նախանշուած են յաջորդական քայլերը:

Նշենք, որ իրլանտական Diaspora Matters կազմակերպութեան գործադիր տնօրէն Քինկսլի Այքինսը, 2011-ին հրատարակած է ձեռնարկ համաշխարհային սփիւռքի  ռազմավարութեան վերաբերեալ: 2012-ին Ուաշինկթընի մէջ հանդէս եկած է իբրեւ բանախօս Հիլըրի Քլինթընի կազմակերպած սփիւռքի համաշխարհային ֆորումին եւ 2013-ին գլխաւորած է Տապլինի մէջ տեղի ունեցած Համաշխարհային սփիւռքի գիտաժողովը:

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին