*ԱԼԵՔՍ ԱՇՃԵԱՆ*
Երէկ տեղեկատուական աղբիւրէ մը լսեցի, որ Եւրոպա ապաստանարան փնտռող սուրիացի ընտանիքներու զաւակներէն՝10,000 անմեղ երախաներ առեւանգուած են:
Որո՞նց կողմէ: Մարդահէններու՝ մարդկային օրկաններ վաճառողներու կողմէ: Անմարդկայնութեան գագաթնակէտն է այս:
Սուրիոյ կնճռոտ տագնապը իր տարբեր երեսներով անհանդուրժելի դարձաւ: Կարելի՞ է մարդ արարածը նման բարբարոսութիւններ կատարէ եւ տակաւին մարդ կոչուի: Եւ այս բոլորը կատարուին ի տես աշխարհի մը, որ ինքզինք քաղաքակրթուած կը կոչէ: Աշխարհ մը որ երեք կապիկներու խաղը կը խաղայ՝ չտեսայ, չլսեցի եւ ոչինչ ունիմ ըսելիք:
Ատենին Չարլզ Տարուին տեսութեամբ մը մէջտեղ ելաւ, թէ մարդը անասունէ յառաջացած է: Հակառակ Տարուինի տեսութեան հանդէպ ունեցած վերապահութեանս, վերոյիշեալը դէպքը ինծի մտածել կու տայ այսօր , որ ոչ թէ մարդը անասունէ եկած է, այլ յստակօրէն դէպի անասնութիւն կ’երթայ…:
