Յունուար 19-ին կը լրանայ պոլսահայ լրագրող եւ հրապարակախօս, «Ակօս» հայկական շաբաթաթերթի գլխաւոր խմբագիր Հրանդ Տինքի սպանութեան 9-րդ տարին: Տինքի մահուան տարելիցի օրը, Կ. Պոլսոյ Սկիւտար թաղամասին մէջ գտնուող՝ Գալֆայեան հայկական դպրոցի պատին վրայ յայտնուած է ցեղապաշտական գրութիւն մը: Այդ մասին ըստ Akunq.net-ի կը հաղորդեն թրքական լրատուամիջոցները:
Աղբիւրին համաձայն պատին վրայ մասնաւորաբար գրուած է «Ստրուկ հայ» արտայայտութիւնը: Նշենք, որ նախապէս ալ պատահած է, որ Տինքի մահուան տարելիցի օրը, Թուրքիոյ մէջ նկատուին հակահայկական ցեղապաշտական դրսեւորումներ, օրինակ փողոցի մէջ յայտնուին Տինքի մարդասպանին պէս` սպիտակ գլխարկներ կրող ոստիկաններ եւ այլն:
Աղբիւրը նաեւ կը յիշեցնէ, որ Գալֆայեան նախակրթարանն ու միջնակարգ դպրոցը հիմնադրուած են 1866-ին` Սրբուհի եւ Նշան Գալֆայեաններուն կողմէ: Դպրոցը Սթամպուլի Սկիւտար շրջան տեղափոխուած է 1971 թուականին:
