Դեկտեմբեր 17-ին Աւստրիոյ մէջ ՀՀ դեսպանութեան «Հայաստան» մշակութային կեդրոնի մէջ տեղի ունեցաւ՝ Աւստրիա-Հայկական մշակութային ընկերութեան կազմակերպած երեկոն նուիրուած Կոմիտաս վարդապետին: Այս մասին կը յայտնեն Հայաստանի Արտաքին Գործոց Նախարարութեան մամլոյ ծառայութենէն:
Ձեռնարկին իրենց մասնակցութիւնը բերած էին խոստումնալից հայ արուեստագէտներ` երգչուհի Աստղիկ Խանամիրեան եւ դաշնակահարուհի Անի Սարիբէկեան: Որպէս բանախօս երեկոյի ընթացքին ելոյթ ունեցաւ Աւստրիա-Հայկական մշակութային ընկերութեան նախագահ Ռազմիկ Թամրազեան, որ ներկայացուց դրուագներ Կոմիտաս Վարդապետի կեանքէն եւ անոր ստեղծագործական անհարթ ուղին:
Եզրափակիչ խօսքով հանդէս եկաւ Աւստրիոյ մէջ ՀՀ դեսպան Արման Կիրակոսեան, որ շնորհակալութիւն յայտնեց Աւստրիա-Հայկական մշակութային ընկերութեան` տարիներ շարունակ Աւստրիոյ մէջ հայկական մշակոյթը քարոզելու, երկու երկիրներու միջեւ քաղաքակրթական կամուրջներ հաստատելու համար: Ան իր գոհունակութիւնը յայտնեց երեկոյի կազմակերպման եւ արուեստագէտներու ելոյթներու կապակցութեամբ ու երեկոյթին ներկայ մշակոյթի գործիչներուն յորդորեց Հայաստան մեկնելու ընթացքին այցելել՝ Երեւանի պանթէոնի հարեւանութեամբ գտնուող Կոմիտաս Վարդապետի նորաբաց թանգարանը:
