ՀՀ նախագահ Սերժ Սարգսեան եւ տիկին Ռիթա Սարգսեան՝ նախագահի նստավայրին մէջ Ամանորի եւ Սուրբ Ծննդեան տօներուն առիթով, հիւրընկալած են սահմանամերձ շարք մը համայնքներու, ինչպէս նաեւ առարկայական մրցոյթներու («Քենկուրու», «Մեղու») մրցանակակիր, սահմանափակ կարողութիւններով եւ Հայաստանի մէջ ապաստան գտած սուրիահայ փոքրիկներ:
Փոքրիկ հիւրերուն ներկայութեամբ հանդիսաւորութեամբ վառած են նստավայրի տօնածառին լոյսերը, եւ մեկնարկած է տօնական ձեռնարկը: Հանրապետութեան նախագահը իր եւ տիկին Ռիթա Սարգսեանի անունով ջերմօրէն շնորհաւորած է մասնակիցները ու բոլոր փոքրիկներուն՝ Ամանորի եւ Սուրբ Ծննդեան տօներուն առիթով բարեմաղթանքներ յղած:
Սահմանամերձ համայնքներէն փոքրիկները մայրաքաղաք ժամանած են մէկ օր առաջ, եւ նախագահի նստավայրին մէջ տօնական ձեռնարկին մասնակցելէ բացի, անոնց համար կազմակերպուած է մշակութային լրացուցիչ ծրագիր` այցելութիւն Հայաստանի պատմութեան թանգարան եւ Յովհաննէս Թումանեանի տուն-թանգարան: Փոքրիկներուն համար երէկ նաեւ շրջայց կազմակերպուած է գիշերային տօնական Երեւանի մէջ:
