Գարեգին Բ. Ամենայն Հայոց Կաթողիկոսի օրհնութեամբ ու Հայաստանի Կրթութեան եւ գիտութեան նախարարութեան աջակցութեամբ, Մայր Աթոռ Սուրբ Էջմիածնի Քրիստոնէական դաստիարակութեան կեդրոնը (ՔԴԿ), ՀՀ հանրակրթական դպրոցներու 5-12-րդ դասարաններու աշակերտներուն մէջ կազմակերպած է՝ Հայոց Ցեղասպանութեան հարիւրամեայ տարելիցին նուիրուած «Երաշտ եւ բողբոջ» համապետական լուսանկարչական մրցոյթը:
Մայր Աթոռ Ս. Էջմիածինի տեղեկատուական համակարգի փոխանցմամբ` Դեկտեմբեր 19-ին` ժամը 13.00-ին, Երեւանի Ս. Աննա եւ Ս. Կաթողիկէ եկեղեցիներուն կից սրահին մէջ, տեղի պիտի ունենայ «Երաշտ եւ բողբոջ» լուսանկարչական մրցոյթի մրցանակաբաշխութեան արարողութիւնը, որուն ներկայ պիտի ըլլան ՀՀ Կրթութեան եւ Գիտութեան նախարար Արմէն Աշոտեան, ԱԺ պատգամաւորներ եւ ՔԴԿ համագործակից կառոյցներու ներկայացուցիչներ:
Մրցանակներու պիտի արժանանան 3 լաւագոյն լուսանկարներու հեղինակները` «Լաւագոյն մտայղացում», «Լաւագոյն աշխատանք», «Յատուկ մրցանակ» անուանակարգերուն մէջ, ինչպէս նաեւ լաւագոյն մասնակցութեան համար 14 լուսանկարներու հեղինակներ:
