Դեկտեմբեր 19-ին Պուէնոս Այրէսի մէջ Արժանթինի երաժշտահաններու միութեան նախաձեռնութեամբ, տեղի պիտի ունենայ համերգ նուիրուած համամարդկային խաղաղութեան:
Ելոյթ պիտի ունենան Արժանթինի մէջ ճանաչում ունեցող երաժիշտներ ու անհատ կատարողներ: Համերգին մասնակցելու հրաւէր ստացած են նաեւ արժանթինահայ երաժիշտ Գագիկ Գասպարեան եւ երաժշտահան Մարիա Քրիստինա Գասեմը, որ ծագումով հայ է:
Այս մասին «Հայերն Այսօրին» տեղեկացուց Գագիկ Գասպարեան: Երաժիշտը հանդէս պիտի գայ հայկական մեղեդիներու կատարումներով, ինչպէս նաեւ «Հայու հոգին» ստեղծագործութեան առաջին ելոյթով, որուն հեղինակը Մարիա Քրիստինան է:
Համերգը տեղի պիտի ունենայ Արժանթինի փաստաբաններու միութեան մէջ:
Աւելցնենք, որ Գագիկ Գասպարեան 2015 թուականին իր բոլոր ելոյթները նուիրած է Հայոց Ցեղասպանութեան 100-րդ տարելիցին: Նպատակը օտար հանդիսատեսին 20-րդ դարու առաջին Ցեղասպանութեան մասին իրազեկելն է:
