Cngcoins.com կայքը առցանց (online) աճուրդի հանած է Կիլիկիոյ արքայ Լեւոն Առաջինի (1198-1219) գահակալութեան ժամանակաշրջանին պատկանող հայկական շատ հազուագիւտ ոսկեայ մետաղադրամ, կը հաղորդէ News.am-ը:
Մետաղադրամին տրամագիծը 19.5 միլիմեթր է, ծանրութիւն` 2.46 կրամ: Մետաղադրամին մէկ կողմը պատկերուած է Լեւոն Առաջինը` առիւծի գահին բազմած, ձախ ձեռքին ջրաշուշան, իսկ աջին խաչ: Մետաղադրամին հակառակ կողմը ետեւի երկու թաթերուն վրայ կանգնած առիւծ է` կաթողիկոսի խաչով:
Աճուրդի դրուած մետաղադրամը ներկայացուած է Լոուրենս Ատըմսի «Արարատեան հաւաքածոյ»-էն: Անոր սկզբնական գինը 50 000 տոլար է: Կիլիկեան մետաղադրամին նոր սեփականատէրը յայտնի պիտի դառնայ 2016ի Յունուարի սկիզբը:
***
Մեր մաղթանքն է, որ այս հազուագիւտ մետաղադրամը գնողը ըլլայ ազնիւ հայորդի մը, զայն նուիրելու հայկական հաստատութեան մը՝ ուր ան պէտք է պահապանուի, նախընտրաբար Հայրենիքի մէջ։
«Խմբ.»
