Գերմանացի լրագրող, գրող Եուրգեն Կոտշլիգը Դեկտեմբեր 2-ին Սթամպուլի մէջ պիտի ներկայացնէ իր՝ «Գերմանիոյ պատասխանատուութիւնը Հայոց Ցեղասպանութեան մէջ» գիրքը:
Ըստ ermenihaber.am-ի թրքական «Demokrat haber» լրատուական կայքը կը տեղեկացնէ, որ գիրքի շնորհանդէսին ժամանակ գրողը հատուածներ պիտի կարդայ գիրքէն, ապա պիտի պատասխանէ ներկաներու հարցերուն:
Գիրքը կը ներկայացնէ, թէ ինչպէս Գերմանիան, որ կը ցանկար Առաջին համաշխարհային պատերազմի ժամանակ իր տիրապետութիւնը հաստատել Արեւելքի մէջ, Թուրքիան ներքաշեց պատերազմի ոլորտ: Օսմանեան կայսրութեան բանակին մէջ ծառայող գերմանացի զինուորները հայերը լրտես եւ դաւաճան կը համարէին: Իսկ երբ հայերուն բռնի տեղահանութիւնը Ցեղասպանութեան վերածուեցաւ, գերմանական կառավարութիւնը գտաւ, որ միլիոնաւոր մարդոց կոտորածը «դաժան, սակայն արդիւնաւէտ մեթոդ է»: Ըստ հեղինակին Գերմանիան անտեսած է հայերուն դէմ կատարուող վայրագութիւններուն վերաբերեալ՝ դիւանագէտներու եւ հոգեւորականներու մտահոգութիւնները:
Եուրկեն Կոտշլիգը գիրքը գրելու համար այցելած է այն վայրերը, ուր տեղի ունեցած են դէպքերը, հանդիպած է Ցեղասպանութեան զոհերու հարազատներու հետ, ուսումնասիրած է գերմանական եւ թրքական արխիւները:
