Պետդումայի մէջ օրէնքի նախագիծ ներկայացուած է, Թուրքիոյ կողմէ Հայոց Ցեղասպանութեան ժխտման համար՝ զայն պատասխանատուութեան կանչելու: Այդ մասին Tweeter-ի իր էջին մէջ գրած է «Արդար Ռուսաստան»ի առաջնորդ Սերկէյ Միրոնով:
«Քիչ առաջ մենք օրէնքի նախագիծ ներկայացուցինք՝ Թուրքիոյ կողմէ 1915ին իրականացած Ցեղասպանութեան ժխտման համար պատասխանատուութեան կանչելու մասին», նշուած է հաղորդագրութեան մէջ, կը տեղեկացնէ News.am-ը:
Նախապէս յայտնի դարձած էր, որ Թուրքիոյ նախագահ Ռեճեպ Թայիպ Էրտողան իր ռուս գործընկեր Վլատիմիր Փութինը քննադատած էր՝ 1915ի Հայոց Ցեղասպանութեան մասին արտայայտուելու համար: Ինչպէս կը նշուի, Երեւան իր այցելութեան ընթացքին՝ Փութին յարգած էր 20րդ դարասկիզբի զոհուածներուն յիշատակը: Թուրքիոյ արտաքին գործոց նախարարութիւնը պաշտօնապէս դատապարտած էր Փութինը, որ 100 տարիներ առաջ տեղի ունեցածը Ցեղասպանութիւն կոչած էր:
