«Արցախի ձայներ» համոյթի երաժշտական խումբի կատարմամբ, «Ղարաբաղցին» երգի հիման վրայ նոր տեսահոլովակ նկարահանուած է:
Այս մասին ըստ «Արցախփրես»-ի ըսած է «Արցախի ձայներ» նախագիծի արտադրող Լիրա Քոչարեան։ Տեսահոլովակի նկարահանումերը կատարուած են Ստեփանակերտի եւ Շուշիի մէջ` «Տաշիր» բարեգործական հիմնադրամի միջոցներով:
«Մեր հասարակութեան մեծ մասին այս երգը արդէն ծանօթ էր: Իմ մտայղացմամբ փորձեցի նոր ձեւով ու նոր ոճով ներկայացնել երգը, որպէսզի յատկապէս երիտասարդութեան համար ան աւելի սիրելի ու սրտամօտ ըլլայ,- ըսած է Լ. Քոչարեան եւ աւելցուցած,- ի դէպ վերջերս «Արցախեան օրերը Մոսկուայում» ծրագիրի շրջանակներուն մէջ, կայացաւ տեսահոլովակի առաջին ցուցադրութիւնը` արժանանալով ներկաներու մեծ արձագանգին եւ ընդունելութեան»:
«Ղարաբաղցին» տեսահոլովակի բեմադրիչներն են Արսէն Բայադեան եւ Արտեոմ Աբովեան:
