Ամերիկեան յայտնի «Քոնան» հեռուստածրագիրի Հայաստանի մասին պատմող հաղորդումը արդէն հասանելի է համացանցի վրայ: Ինչպէս կը հաղորդէ «Արմէնփրես»-ը, հաղորդման հեղինակ եւ վարող Քոնան Օ’պրայըն իր օգնականը` Սոնա Մովսէսեանը կը բերէ Հայրենիք` Հայաստան, ուր ալ կը սկսին անոնց արկածներն ու բացայայտումները:
Հաղորդման վերաբերեալ ամերիկեան հեղինակաւոր Huffington Post պարբերականը գրած է. «Ամերիկեան յայտնի շոումեն Քոնան Օ’պրայընի «Քոնան» հեռուստածրագիրի` Հայաստանի մասին պատմող հաղորդումը ոչ միայն լաւ կը զուարճացնէ բոլոր հեռուստադիտողները, այլեւ կը դիպչի հոգիի նուրբ լարերուն»:
«Քոնան» ծրագիրը Հայաստանի մասին պատմող հաղորդումը կը ներկայացնէ, թէ ինչպէս Քոնան իր արդէն 6 տարուան օգնականին` Սոնա Մովսէսեանի ընտանիքին կը յայտնէ, որ կը ցանկանայ զայն իրեն հետ տանիլ Հայաստան:
Այստեղ անոնք կ՛այցելեն մայրաքաղաք Երեւանի տեսարժան վայրեր, կ՛ըլլան հայկական շուկայի մէջ, ուր Քոնանը կը փորձէ վաճառողներուն հետ խօսիլ հայերէն` մէջբերելով այնպիսի արտայայտութիւններ, ինչպէս «ճիկեարդ ուտեմ», «մեռնեմ ճանիդ» եւ այլն: Էրեբունի-Երեւան տօնակատարութիւններու օրը ականատես կ՛ըլլայ կեդրոնին մէջ կազմակերպուած մեքենաներու ցուցադրութեան, սուրիահայ երիտասարդներու հետ կը մասնակցի երեւանեան գլխաւոր համերգին:
Հայաստանի միւս շրջաններ այցելութեան ժամանակ ան կը տեսնէ հայ հովիւներ եւ կը զարմանայ` ինչու անոնք աւանդական հովիւի հագուստ չեն կրեր: Փոխարէնը ատիկա կ՛ընէ ինքը` Քոնանը: Ան կը նկարահանուի հայկական «Ուրիշի հոգին» հեռուստադիպաշարի դրուագներէն մէկուն մէջ, կը ծանօթանայ հայկական գորգերուն, լաւաշին եւ տնական օղիի պատրաստման գործընթացին:
Քոնանի եւ Սոնայի Հայաստան կատարած այցի ամենայուզիչ պահը՝ Հայոց Ցեղասպանութեան յուշահամալիր այցելութիւնն է, ուր Սոնան իր ընտանիքին պատմութիւնը պատմելու ընթացքին չի կրնար զսպել իր արցունքները: Ան կը նշէ, որ իր ընտանիքը պատմական Հայաստանի Սեբաստիա նահանգէն է: Սոնան կ՛ընդգծէ, որ կը ցանկանար այստեղ վերադառնալ իր ընկերներուն ու ընտանիքին հետ` աւելցնելով, որ ցանկութեան պարագային Քոնան եւս կրնար միանալ իրենց:
