Հայաստանի մէջ Եւրոպական Միութեան (ԵՄ) պատուիրակութեան ղեկավար դեսպան Փիոթըր Սվիթալսքին երէկ յայտարարած է, որ Փարիզի մէջ 13 Նոյեմբերին տեղի ունեցած ահաբեկչական գործողութիւնները բացասաբար չեն անդրադառնար՝ Հայաստանի հետ վիզայի կարգը ազատականացնելու մտադրութեան վրայ:
Նախապէս «Մետիամաքս»ին հետ հարցազրոյցի ընթացքին դեսպանը ըսած էր, որ եթէ ամէն ինչ ընթանայ ըստ նախատեսուածի, ապա հնարաւոր պիտի ըլլայ 2016ին սկսիլ նախնական բանակցութիւնները՝ Հայաստանի հետ վիզայի ազատականացման երկխօսութեան շուրջ:
Երէկ լրագրողներուն հետ զրոյցի ընթացքին Փիոթըր Սվիթալսքի վերահաստատած է այս հարցով ԵՄի յանձնառութիւնը:
Ինչ կը վերաբերի ՀՀ քաղաքացիներուն Շէնկենի վիզաներու տրամադրման՝ դեսպանը ընդգծած է, որ այդ գործընթացը պիտի իրականանայ նախկինին պէս, սակայն Հայաստանի քաղաքացիները կրնան հանդիպիլ անվտանգութեան խստացուած քայլերու Շէնկենի գօտիի տարածքին:
Փիոթըր Սվիթալսքի նկատել տուած է, որ ահաբեկիչները չյաջողեցան խախտել մարդու հիմնարար իրաւունքներէն մէկը` ազատ տեղաշարժի իրաւունքը:
