Նոյեմբեր 20-21-ին «Ոչնչացուած քաղաքակրթութիւն. ոչ մահմետականներու ունեցուածքը օսմանեան շրջանի վերջը եւ Հանրապետական շրջանի սկիզբը» խորագիրով գիտաժողով տեղի պիտի ունենայ Սթամպուլի մէջ:
Ըստ «Ակօս» թերթի կայքին` գիտաժողովը կազմակերպուած է Հրանդ Տինքի հիմնադրամի, Պողազիչի համալսարանի պատմութեան բաժանմունքի, Սապանճը եւ Պիլկի համալսարաններու համագործակցութեամբ:
Գիտաժողովը, որուն կը մասնակցին գիտնականներ ինչպէս Թուրքիայէն, այնպէս ալ արտասահմանէն, պիտի իրականանայ երեք լեզուներով` հայերէն, թրքերէն եւ անգլերէն:
Ժողովի ընթացքին պիտի քննարկուին այնպիսի թեմաներ, ինչպէս 1914-1924թթ. եւրոպական դրամագլուխը ներկայացնող ոչ մահմետական առեւտրականները, 1915-ին եւ անկէ ետք ոչ իսլամներու ունեցուածքի բռնագրաւման եւ բաժանման գործընթացի քաղաքական, մշակութային եւ տնտեսական հետեւանքները, ոչ մահմետականներու կողմէ հիմնադրուած առեւտրական ձեռնարկութիւններու պատմութիւնը, ոչ մահմետական ձեռնարկատէրերու` օսմանեան քաղաքներու նկատմամբ ստանձնած բարեգործական պարտաւորութիւնները, Անատոլիայէն դէպի խոշոր քաղաքներ ձեռնարկատէրերու գաղթը, ոչ մահմետական առեւտրականներու եւ կրօնական համայնքներու յարաբերութիւնները:
