Ֆրանսահայ աշխարհահռչակ երգիչ Շարլ Ազնաւուր, այլեւս Պելճիքայի Թագի շքանշանի ասպետ է (Commandeur de l’Ordre de la Couronne): Ինչպէս կը տեղեկացնէ «Արմէնփրես»-ը` վկայակոչելով երգիչի պաշտօնական Ֆէյսպուքի էջը, Ազնաւուր այդ կոչման արժանացած է Նոյեմբեր 16-ին Պրիւքսէլի Egmont Palace-ի մէջ:
Շարլ Ազնաւուր շնորհակալութիւն յայտնած է Պելճիքային, որ անոր հաւաստիացմամբ «միշտ ունեցած է հիասքանչ հանդիսատես»: Արարողութեան ընթացքին մասնակիցները մէկ վայրկեան լռութեամբ յարգած են՝ Փարիզի ահաբեկչութեանց հետեւանքով զոհուածներուն յիշատակը:
Պելճիքայի արտաքին գործոց նախարար Տիտիէ Ռէյնդըր խօսած է արուեստագէտին բարձր յատկանիշներու մասին: Telebruxelles.be-ն անդրադառնալով Ազնաւուրի Պելճիքայի Թագի շքանշանի ասպետ դառնալու փաստին՝ շեշտած է, որ հայկական ծագում ունեցող երգիչը կը պայքարի Հայոց Ցեղասպանութեան ճանաչման համար:
Կայքը նաեւ կ՛ընդգծէ, որ Պելճիքան ներկայացուցիչներու պալատի նախաձեռնութեամբ եւ բոլորովին վերջերս, Պելճիքայի վարչապետ Չարլզ Միշելի ձայնով ճանչցած է Հայոց Ցեղասպանութիւնը:
91ամեայ երգիչը Նոյեմբեր 17-ին Պրիւքսէլի Forest National սրահին մէջ պիտի երգէ պելճքիացի իր հանդիսատեսին համար:
Թագի շքանշանը Պելճիքայի արքայական պետական պարգեւն է: Անիկա ստեղծուած է 1897 թուականին:
