Հայաստան պատրաստ է դառնալու միջազգային գործարար համայնքի շահերու կեդրոն` պիզնես գործունէութեան համար բարենպաստ պայմաններուն աւելցնելով աւանդական հայկական հիւրընկալութիւնը:
Երէկ Երեւանի մէջ մեկնարկած Հայաստան-ԱՄՆ առեւտուրի եւ ներդրումներու հարցերով խորհուրդի առաջին նիստի ժամանակ, իր ողջոյնի խօսքին մէջ նշած է ՀՀ տնտեսութեան նախարար Կարէն Ճշմարիտեան, կը փոխանցէ Panorama.am-ը:
«ՀՀ կառավարութեան եւ ԱՄՆ կառավարութեան միջեւ վերջերս ստորագրուած առեւտուրի եւ ներդրումներու մասին շրջանակային համաձայնագիրը, նոր հնարաւորութիւններ կը ստեղծէ ներդրումներու եւ երկու երկրներու միջեւ ապրանքաշրջանառութեան, առեւտուրի խրախուսման եւ առկայ ոլորտներու մէջ համագործակցութեան ընդլայնման ու համագործակցութեան նոր ոլորտներու բացայայտման համար», նշած է նախարարը:
Խորհուրդի անդրանիկ նիստին ԱՄՆ պատուիրակութեան ղեկավարը եւ ամերիկեան կողմի համանախագահը` ԱՄՆ Առեւտուրի փոխներկայացուցչի տեղակալ Էլիզապեթ Հաֆնըր նշած է, որ ասիկա համագործակցութեան սկիզբն է եւ այս քննարկումները կողմերուն հնարաւորութիւն կու տան բացայայտելու բոլոր խոչընդոտներն ու հնարաւորութիւնները, որոնք առկայ են առեւտրային ոլորտին մէջ: Ան այստեղ կարեւոր համարած է նաեւ մասնաւոր հատուածի ներգրաւուածութիւնը:
Նշենք, որ խորհուրդը հիմնուած է 17 Մայիս 2015ին` երկու երկիրներու միջեւ ապրանքներու եւ ծառայութիւններու առեւտուրի ընդլայնման նպատակով:
Նիստին կը մասնկացին կառավարութեան գերթէ բոլոր գերատեսչութիւններէն ներկայացուցիչներ, նաեւ ոլորտային փորձագէտներ եւ աւելի քան 60 գործարարներ:
