Չորեքշաբթի, 19. 06. 2024

spot_img

Այս Սուգի Պար Չէ – Հ.Բ.Ը.Մ. Հ.Ե.Ը.ի ԱՐԻՆ Պարախումբը Բեմին Վրայ

*ՍԵՒԱԿ ՅԱԿՈԲԵԱՆ*

Շաբաթավերջի երկու օրերուն Տպայէյի «Համագումարներու Պալատ»ին մէջ Հ.Բ.Ը.Մ. Հ.Ե.Ը. ԱՐԻՆ պարախումբը ներկայացուց իր տարեկան ելոյթները: 18 անուն պարացանկով ԱՐԻՆ պարախումբի 7էն մինչեւ 25 տարեկան պարուհիներն ու պարողները բեմը թնթացուցին հայաշունչ պարերով: Ի պատիւ անոր գեղարուեսատական ղեկավար ու պարուսոյց Գայիանէ Մածունեանին, պարերուն համար բծախնդրօրէն ընտրուած երաժշտութիւնը մաքուր եւ զուտ հայկական էր:

2

ԱՐԻՆ պարախումբի այս տարուան ելոյթին յատկանշական էր ոճի փոփոխութեան հետ ընկերացող՝ արհեստագիտութեան ապաւինած բեմի խորքին պաստառային շարժող յարդարանքը, որ տարբեր էր անցնող տարիներէն:

Յատկանշական էր ելոյթին մէջ մեծ թիւով փոքրիկ պարողներու ներկայութիւնը, որ ոչ միայն ուրախանալի է մատղաշ սերունդին Հայ մշակոյթը փոխանցելու իմաստով՝ այլ նաեւ Պէյրութի Հ.Բ.Ը.Մ. Հ.Ե.Ը.ի հպարտութիւնը հանդիսացող ԱՐԻՆի յարատեւութիւնը երաշխաւորոելու առումով:

Ուշագրաւ էր Հայոց Ցեղասպանութեան 100ամեակին նուիրուած պարը, որ սուգի պար չէր՝ այլ արտայայտչական ոճի պատկանող արդիական ու շատ խորհրդանշական պարային բեմականացում մը:

Արդարեւ ամբողջ պատկերը փիլիսոփայական ոճով մը կը ներկայացնէր՝ Ցեղասպանութեան ազդեցութիւնը անոր արդիւնքը եղող մնացորդացին եւ անկէ ծնած սերունդներուն հոգեբանութեան վրայ: «Զոհի հոգեբանութիւն»ը զոր տարիներ իր մէջ կրած է Հայ ժողովուրդը: Կախաղանի պարանի տեսքով փողկապները բաւական արտայայտիչ էին: Ամենախորհրդանշականը պարողներուն կողմէ գրատախտակին վրայ գծուող գծիկներն էին, որոնք կը ներկայացնէին բանտարկեալներու բանտին մէջ պատին վրայ իրենց տարիները եւ օրերը հաշուելու պատկերը, որ աւարտին հասաւ հարիւր գիծերու ամբողջացումով…: Պարուսոյցին առաջադրած փոխան «հոգեհանգիստ»ի «հոգեզննութիւն»ը յաջողեցաւ հանդիսատեսը առաջնորդել՝ «Զոհի հոգեբանութեան» բանտային կաշկանդումէն դէպի հոգեկան ազատագրում ուղղուելու անհրաժեշտութիւնը…:

Նշենք, որ Շաբաթ օրուան առաջին ելոյթը իր ներկայութեամբ պատուած էր ՀԲԸՄի Նախագահ Մեթր Պերճ Սեդրակեան: Ներկայ էր Լիբանանի մօտ Հայաստանի Հանրապետութեան Դեսպան Աշոտ Քոչարեան եւ Լիբանանի Մշակոյթի նախարարին ներկայացուցիչը: Ներկայ էին նաեւ ՀԲԸՄի Լիբանանի Շրջանակային Յանձնաժողովի ատենապետ Ժերար Թիւֆէնքճեան, ՀԵԸի Լիբանանի Կեդրոնական Վարչութեան ատենապետ Վիգէն Չէրչեան, ԹՄՄ Հիմնադիրներու Մարմնի ատենապետ Յակոբ Գասարճեան, քաղաքական ու միութենական ներկայացուցիչներ եւ մեծ թիւով արուեստասէր հանրութիւն մը:

Անհունօրէն գնահատելի է ԱՐԻՆի գեղարուեստական ղեկավար եւ պարուսոյց Գայիանէ Մածունեանը, մարդկային նուազագոյն սխալներով բեմ բարձրացուցած այս հսկայ խումբին գեղեցիկ ներկայացումին համար: Համբուրելի են ԱՐԻՆի անդամ իւրաքանչիւր պարուհին ու պարողը: Վարձքը կատար ԱՐԻՆ պարախումբի վարչութեան իր ատենապետուհիով ու անդամներով, գեղարուեստական խումբի անդամներով ու բոլոր այն անյայտ զինուորներով, որոնք քուլիսներու ետին քրտնաթոր աշխատանքով ԱՐԻՆի ելոյթի յաջողութեան սատարեցին: Ողջունելի է ԱՐԻՆը հովանաւորող Մեծ Միութիւնն ու Հայ Երիտասարդաց Ընկերակցութիւնը:

Յարատեւութիւն ու նորանոր յաջողութիւններ ԱՐԻՆին:

 

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին