ՀՀ Արդարադատութեան նախարար Արփինէ Յովհաննիսեան, 12 Նոյեմբերին ընդունած է Հայաստանի մէջ Միացեալ Նահանգներու դեսպան Ռիչըրտ Միլզը:
Ըստ «Արմէնփրես»ի նախարար Յովհաննիսեան բարձր գնահատած է Միացեալ Նահանգներու կառավարութեան աջակցութիւնը՝ Հայաստանի մէջ իրականացող դատաիրաւական ոլորտի բարեփոխումներուն եւ նշած, որ ներուժ գոյութիւն ունի շարք մը այլ ուղղութիւններով եւս համագործակցութիւնը խորացնելու:
Հանդիպման ընթացքին կողմերը քննարկած են դատաքննութեան ծառայութեան ոլորտին մէջ կատարուելիք բարեփոխումներուն, դատական համակարգին մէջ ելեկտրոնային կառավարման եւ տուեալներու պաշարի վերաբերող համակարգին հետագայ զարգացման, հակափտածութեան քաղաքականութեան վերաբերող հարցեր, ինչպէս նաեւ նախարարը ներկայացուցած է շարք մը նոր ծրագիրներու տեսլականը:
Դեսպանը շնորհակալութիւն յայտնած է նախարարին եւ հաստատած, որ Միացեալ Նահանգներու կառավարութիւնը պատրաստակամ է շարունակելու Հայաստանի հետ գործակցութիւնը՝ փտածութեան դէմ պայքարի, արդարադատութեան համակարգի բարեփոխումներու, ինչպէս նաեւ մարդու իրաւունքներու ամրապնդման հարցերուն մէջ: Ըստ անոր կան տարբեր ուղիներ, որոնցմով Միացեալ Նահանգներու դեսպանութիւնն ու Հայաստանի Արդարադատութեան նախարարութիւնը կրնան գործակցիլ այս բարեփոխումները իրականացնելու իմաստով: Ան շեշտած է, որ կը սպասէ համագործակցութեան յառաջիկայ ծրագիրներու։
Հանդիպման աւարտին կողմերը վերահաստատած են վերոնշեալ բնագաւառներուն, ինչպէս նաեւ նոր ու տարբեր ծրագիրներու մէջ փոխգործակցութիւնը խորացնելու պատրաստակամութիւնը:
