ԳՈՀԱՐ գերազանց յաջողութեամբ եւ բերկրանքով հանդէս եկաւ չորս իրիկնաշող, իրերայաջորդ համերգներով՝ 29, 30, 31 Հոկտեմբեր եւ 1 Նոյեմբեր 2015ին: Օգտագործելով ամէնէն արդիական արհեստագիտութիւնը՝ ան հանդիսացաւ մեծագոյն արտադրութիւններէն մէկը, որուն ականատես եղած է Լիբանանը:
Ֆորում Տը Պէյրութի աստղազարդ լուսաւորման ներքեւ, իւրաքանչիւր համերգին ներկայ եղաւ 2250 հանդիսատես: Համերգները ուղղակի սփռուեցան Հայաստանի Հանրային հեռուստատեսութեան եթերով, ինչպէս նաեւ համացանցի արտահոսքով, որոնք առիթ ընծայեցին Սփիւռքի բիւրաւոր ակնդիրներուն՝ մասնակից դառնալու եւ ըմբոշխնելու Հայ երաժշտութիւնն ու մշակոյթը «ԳՈՀԱՐ-ի Բոլոր Ժամանակներու Սիրուած Երգեր»ով:
ԳՈՀԱՐ համոյթը անսալով իր սկզբունքին,- սատար հանդիսանալ Ա. Բ. Գ.ին եւ Հայ մշակոյթին,- համերգներու տոմսերու վաճառքէն գոյացած ամբողջական հասոյթը կը նուիրէ 100 կարիքաւոր Հայ աշակերտներու: Մօտաւորապէս $260,000 գումարը պիտի գայ ամբողջացնելու՝ աշակերտներուն թոշակի վճարումը 2015 – 2016 դպրոցական տարեշրջանին:
Համերգները կայացան Հայոց Ցեղասպանութեան հարիւրամեակի ոգեկոչման ծիրէն ներս:
«100 Տարի Ցեղասպանութենէ Վերապրած, 100 Երգով Վերածնած»:
