UWC Հայաստանի ազգային կոմիտէն կը յայտնէ, որ UWC համակարգին մէջ 2016-2018 թուականներուն ուսանելու համար, ՀՀ քաղաքացիներուն յայտերը կ՛ընդունուին մինչեւ 17 Նոյեմբերը ներառեալ, կը հաղորդէ «Մետիամաքս»ը:
UWC քոլեճներ կ՛ընդունուին աշխոյժ եւ ստեղծագործ 16-17 տարեկան պատանիներ: UWC-ին մէջ կը գործէ ուսման դրամաշնորհներու համակարգ, որ թոյլ կու տայ ուսանողներուն կրթութիւն ստանալ UWC քոլեճներուն մէջ` անկախ ծնողներու ֆինանսական հնարաւորութիւններէն: Ուսանողները կ՛ընտրուին երկիրներու ազգային կոմիտէներուն կողմէ:
Ուսման յայտերը կ՛ընդունուին UWC Հայաստանի ազգային կոմիտէի կայքին մէջ` https://www.am.uwc.org/:
UWC (United World Colleges) կրթական համակարգ է, որ ստեղծուած է 1962-ին: Ան կը ներառէ 15 քոլեճ ԱՄՆի, Գանատայի, Մեծ Բրիտանիոյ, Գերմանիոյ, Հայաստանի, Սինկափուրի, Իտալիոյ, Հոլանտայի, Նորվեկիոյ, Հնդկաստանի, Պոսնիա- Հերցեկովինայի, Չինաստանի, Քոսթա Ռիքայի եւ Սվազիլենտի մէջ:
UWC Dilijan College-ը բացուած է 2014 թուականին: Այս տարի քոլեճին մէջ կ՛ուսանին 190 պատանիներ աշխարհի 63 երկիրներէ` Ռուսաստանէն, Հայաստանէն, ԱՊՀ այլ երկիրներէ, Եւրոպայէն, Միջին Արեւելքէն, Ափրիկէէն, Հիւսիսային ու Հարաւային Ամերիկայէն եւ Աւստրալիայէն:
UWC համակարգին մէջ ընդգրկուած են հայաստանցի 43 ուսանողներ, որոնցմէ 21-ը կ՛ուսանին UWC Dilijan College-ին մէջ:
UWC քոլեճներուն մէջ ուսուցումը կ՛իրականացուի Միջազգային պաքալաւրիատի (IB) երկամեայ նախահամալսարան ծրագիրով` անգլերէն լեզուով:
