Ս. Փեթերզպուրկի Վասիլեւեան կղզիին մէջ 6 Նոյեմբերին բացուեցաւ Կոմիտասի` Ռուսիոյ մէջ առաջին յուշարձանը: Այդ մասին ինչպէս կը տեղեկացնէ «Արմէնփրես»ը, ԹԱՍՍ-ին յայտնած են քաղաքի կառավարութեան մամուլի ծառայութենէն: «Երգահան Կոմիտասի յուշարձանի տեղադրման նախաձեռնողը Ս. Փեթերզպուրկի մէջ Երեւանի քաղաքապետարանի ներկայացուցչութիւնն է` Փեթերզպուրկի Վասիլէոստռովեան շրջանի վարչակազմի աջակցութեամբ»,- նշած է մամուլի ծառայութիւնը:
Յուշարձանի բացման հանդիսաւոր արարողութեան մասնակցեցան Փեթերզպուրկի նահանգապետ Գէորգի Փոլթաւչենքոն եւ Երեւանի քաղաքագապետ Տարօն Մարգարեանը, Փեթերզպուրկի Հայաստանի հիւպատոսը եւ Ռուսիոյ մօտ Հայաստանի դեսպանը : Վասիլեւեան կղզիին մէջ քաղաքի հիմնադրման ժամանակներէն հաստատուած է հայ համայնք:
Երգահանի 3 մեթր բարձութեան կրանիթէ քանդակը զետեղուած է Քամսքի այգիի կեդրոնը` Սմոլենքա գետէն ոչ հեռու:
Նախապէս Կոմիտասի յուշարձաններ տեղադրուած են Տիթրոյթի՝ ԱՄՆ, Փարիզի՝ Ֆրանսա, Քէպէքի՝ Գանատա եւ այլ վայրերու մէջ:
