«100 Կեանք» («100Lives») նախաձեռնութիւնն ու Near East Foundation-ը յայտարարած են՝ 7 միլիոն տոլար կազմող նոր ութամեայ կրթաթոշակային ֆոնտի ստեղծման մասին: Բարեգործական կրթաթոշակային այս ծրագիրի ծիրէն ներս աջակցութիւն կը տրուի՝ Մերձաւոր Արեւելքի մէջ բնակող 100 ուսանողներու, կը հաղորդէ «Մետիամաքս»ը:
«100 Կեանք» նախաձեռնութիւնը նոր ծրագիրի մասին յայտարարած է՝ Near East Foundation-ի (Մերձաւոր Արեւելքի հիմնադրամ) հարիւրամեայ յոբելեանին նուիրուած հանդիսաւոր ձեռնարկին, որուն ներկայ եղած են մարդասիրական օգնութեան ոլորտին մէջ գործող միջազգային խոշորագոյն կազմակերպութիւններու ղեկավարներն ու հայ համայնքի ներկայացուցիչները:
Ծրագիրը մշակուած է «100 Կեանք»ի եւ Near East Foundation-ի համատեղ ջանքերով` որպէս աշխարհասփիւռ հայութեան երախտագիտութեան հաւաստիք Մերձաւոր Արեւելքի ժողովուրդին, որ մէկ դար առաջ ապաստան ու սնունդ տրամադրեց Եղեռնէն փրկուած հայ փախստականներուն:
Կազմելով մօտ 7 միլիոն տոլար, «100 Կեանք» նախաձեռնութեան եւ Near East Foundation-ի համատեղ այս կրթաթոշակային ծրագիրը հնարաւորութիւն պիտի ընձեռէ՝ հակամարտութիւններու գօտիներու մէջ յայտնուած, տեղահանման ենթարկուած եւ չքաւորութեան մէջ գոյութիւն պահպանող երախաներուն ուսում առնել UWC Դիլիճան քոլէճին` համատեղ ուսուցման միջազգային գիշերօթիկ դպրոցին մէջ, ուր այսօր կ՛ուսանին աւելի քան 60 երկիրներէ երիտասարդներ, ինչպէս նաեւ աշխարհի տարբեր մասերու մէջ գործող UWC ցանցի այլ քոլէճներու մէջ:
Ծրագիրի կառավարումը պիտի իրականանայ «Scholae Mundi» հիմնադրամի միջոցով:
«Մենք կը հպարտանանք, որ ի վիճակի ենք օգնելու ծանր պայմաններու եւ ապագայի նկատմամբ անորոշութեան մէջ յայտնուած ծնողներուն` աւելի լաւ ապագայ կերտելու իրենց զաւակներուն համար, ինչպէս մեզի համար ատիկա ըրած են մեր հայրերն ու պապերը: Մեծ հպարտութեամբ կը յայտնենք Near East Foundation-ի հետ մեր գործընկերութեան մեկնարկի մասին եւ լի ենք առաջին կրթաթոշակակիրներու հետ ծանօթանալու ակնկալիքներով», ըսած է «100 Կեանք» նախաձեռնութեան համահիմնադիր Ռուբէն Վարդանեան:
Կրթաթոշակային ծրագիրի մեկնարկին մասին Near East Foundation-ի հարիւրամեակին նուիրուած բազմամարդ հանդիսութեան ժամանակ յայտարարած է՝ «100 Կեանք» նախաձեռնութեան միւս համահիմնադիր Նուպար Աֆէյեանի դուստրը` Արմինէ Աֆէյեանը:
«Յուսով ենք, որ այդ երախաներուն կրթութիւն ստանալու հնարաւորութիւն ընձեռելով` մենք կ՛ընձեռենք անոնց յաջող ապագայ կերտելու հնարաւորութիւն, որուն անոնք անշուշտ արժանի են: Արդէն հարիւր տարիէ Near East Foundation-ը նուիրումով կ՛իրականացնէ այդ բացառիկ աշխատանքը», ըսած է ան:
Near East Foundation-ը կրթաթոշակային այս ծրագիրին կը մասնակցի Մերձաւոր Արեւելքի եւ Ափրիկէի մէջ կրթական համակարգի, հանրային կառոյցներու կազմակերպման եւ տնտեսական զարգացման ուղղուած իր աւելի ընդարձակ առաքելութեան ծիրէն ներս: Հիմնադրուած ըլլալով 1915ին որպէս «Հայ-սուրիական ամերիկեան նպաստամատոյց կոմիտէ», որ ապա ԱՄՆ Գոնկրէսի որոշումով պետական կարգավիճակ ստացած է «Near East Relief» անուան տակ, Near East Foundation-ը վճռորոշ դեր խաղցած է վերջին 100 տարուան ընթացքին՝ աշխարհի տարբեր մասերու մէջ ծանր կացութեան մէջ յայտնուած մարդոց օգնութեան ձեռք մեկնելու գործին:
«Near East Foundation-ը հպարտութեամբ կը բոլորէ իր գործունէութեան հարիւր տարին` թիւով հարիւր տեղահանուած եւ կարիքի մէջ յայտնուած երախաներուն ընձեռելով միջազգային կարգի կրթութիւն ստանալու հնարաւորութիւն: Մենք մեծ ոգեւորութեամբ կը միանանք «100 Lives» նախաձեռնութեան` տաղանդաշատ երիտասարդներուն եւ ապագայ առաջնորդներուն օգնելու զարգանալ ու յաջողութիւններու հասնիլ իրենց կեանքին մէջ», ըսած է հիմնադրամի նախագահ Չարլզ Պենճամին:
Առաջին կրթաթոշակակիրները UWC համակարգի դպրոցներուն մէջ պիտի ուսանին 2016 թուականին:
