Երեքշաբթի, 28. 05. 2024

spot_img

Մեկնարկեց Դիլիճանի Նոր Եկեղեցւոյ Կառուցման Ծրագիրը

Դիլիճանի մէջ տեղի ունեցաւ քաղաքի նոր եկեղեցւոյ հողօրհնութեան արարողութիւնը եւ յայտարարուեցաւ եկեղեցւոյ կառուցման ծրագիրի մեկնարկը, կը հաղորդէ «Մետիամաքս»ը:

Եկեղեցին կը կառուցուի Մայր Աթոռ Սուրբ Էջմիածինի, Դիլիճանի քաղաքապետարանի, «Հայաստանի զարգացման նախաձեռնութիւններ» (IDeA) հիմնադրամի ու «Դիլիճանի զարգացման հիմնադրամ»ի համատեղ ջանքերով:

Ծրագիրի նուիրատուներն են բարերարներ Ռուբէն Վարդանեան, Գագիկ Ադիբեկեան, ինչպէս նաեւ Մաքսիմ Աթայեանց ու Արմէն Կարապետեան:
Հողօրհնութեան հանդիսաւոր արարողութեան ներկայ եղան Ամենայն հայոց Գարեգին Բ. կաթողիկոս, IDeA հիմնադրամի համահիմնադիր Ռուբէն Վարդանեան, IDeA-ի եւ «Դիլիճանի զարգացման հիմնադրամ»ի ղեկավարներ Էդգար Մանուկեան եւ Արթուր Յակոբեան, մարզային եւ քաղաքային իշխանութիւններու ղեկավարներ, բազմաթիւ հիւրեր եւ դիլիճանցիներ:

Հողի օրհնութեան արարողութիւնը կատարուեցաւ Ամենայն հայոց Գարեգին Բ. կաթողիկոսի ձեռամբ:

Նոր եկեղեցին պիտի կառուցուի Աղստեւ գետի աջ ափին` Երկրորդ համաշխարհային պատերազմին զոհուածներու յիշատակը յաւերժացնող յուշահամալիրին յարող տարածքին մէջ:

Եկեղեցւոյ նախագիծին հեղինակը փեթերզպուրկցի ճարտարապետ Մաքսիմ Աթայեանցն է:

«IDeA հիմնադրամը Դիլիճանում զարգացման տարբեր ծրագրեր է իրականացնում, որոնցից մէկն էլ  քաղաքում եկեղեցու կառուցման  ծրագիրն է: Ճարտարապետ Մաքսիմ Աթայեանցը հետաքրքիր ճարտարապետական լուծումներով նախագիծ է առաջարկել: Վստահ ենք, որ եկեղեցին իսկապէս հոգեւոր կեդրոն կը դառնայ քաղաքի բնակիչների համար», ըսաւ IDeA հիմնադրամի ղեկավար Էդկար Մանուկեան:

Եկեղեցին պիտի ըլլայ կեդրոնագմբէթ` երկու զանգակատուներով, վերջիններս պիտի տեղադրուին գմբէթի երկու կողմերը` երկթէք տանիքներու վրայ: Եկեղեցին տեղադրուած պիտի ըլլայ 4,5 մ բարձրութեամբ պատուանդանի վրայ, որուն մէջ պիտի գործեն  հասարակական օգտագործման տարածքներ`  կամարակապ սրահի մէջէն բացուելով դէպի գետափնեայ փողոցը: Եկեղեցւոյ ընդհանուր մակերեսը կը կազմէ 550 քմ.:

Ներկայիս կ՛ընթանան նախագծային-նախահաշուային աշխատանքները: Շինարարական աշխատանքներուն մեկնարկը կը նախատեսուի 2016ի Ապրիլէն:

5

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին