Աշխատանքային այցով Վրաստան գտնուող Հայաստանի նախագահ Սերժ Սարգսեան, Թիֆլիսի մէջ հանդիպում ունեցաւ Վրաստանի նախագահ Գիորգի Մարգվելաշվիլիի հետ: Երկու երկիրներու նախագահները քննարկած են բարձր մակարդակի հայ-վրացական յարաբերութիւններու օրակարգը, նախանշած զայն առաջ մղելու նոր հեռանկարները, անդրադարձած են քաղաքական, տնտեսական, մարդասիրական եւ այլ ոլորտներու մէջ փոխգործակցութեան զարգացման ուղղուած ընթացիկ ծրագիրերուն:
Ինչպէս կը յայտնեն ՀՀ նախագահի աշխատակազմի հասարակայնութեան և տեղեկատուութեան միջոցներու հետ կապերու վարչութենէն, նախագահներ Սարգսեան եւ Մարգվելաշվիլի երկկողմ ու բազմակողմ ձեւաչափերով փոխշահաւէտ նախագիծերու իրականացման համար կարեւոր համարած են՝ ընդելուզման տարբեր գործընթացներու ծիրէն ներս Հայաստանի եւ Վրաստանի շարունակական համագործակցութիւնը:
Երկու երկիրներու նախագահները միտքեր փոխանակած են նաեւ տարածաշրջանային խնդիրներու եւ մարտահրաւէրներու շուրջ` ընդգծելով տարածաշրջանի կայուն, խաղաղ եւ անվտանգ զարգացման կարեւորութիւնն ու այդ ուղղութեամբ եւս համագործակցութիւնը:
Սերժ Սարգսեան եւ Գիորգի Մարգվելաշվիլի հանդիպման արդիւնքները ամփոփած են լրատուամիջոցներու առջեւ համատեղ յայտարարութիւններով:
