Հայաստանի արտաքին գործոց նախարար Էտուարտ Նալպանտեան յայտարարութեամբ հանդէս եկած է՝ Փարակուէյի Ծերակոյտին կողմէ Հայոց Ցեղասպանութեան ճանաչման վերաբերեալ: Ինչպէս կը տեղեկացնէ ՀՀ Արտաքին գործոց նախարարութեան մամուլի, տեղեկատուութեան եւ հասարակայնութեան հետ կապի վարչութիւնը, նախարարին յայտարարութեան մէջ ըսուած է.
«Հայաստան կ՛ողջունէ Փարակուէյի Ծերակոյտին կողմէ Հայոց Ցեղասպանութեան ճանաչումը: Հայոց Ցեղասպանութեան միջազգային ճանաչման շարունակական ընդլայնումը կը վկայէ, որ մարդկութեան դէմ իրականացած յանցագործութիւնները վաղեմութեան ժամկէտ չունին եւ Հայոց Ցեղասպանութենէն նոյնիսկ հարիւր տարի անց՝ մարդկութիւնը կը շարունակէ ճանչնալ եւ դատապարտել այդ ոճրագործութիւնը:
«Այս քայլով Փարակուէյի Ծերակոյտը կարեւոր ներդրում կատարեց ցեղասպանութիւններու եւ մարդկութեան դէմ յանցագործութիւններու կանխարգիլման միջազգային ջանքերուն»:
Նշենք, որ Փարակուէյի Ծերակոյտը ընդունած է Հայոց Ցեղասպանութիւնը ճանչցող եւ դատապարտող բանաձեւ: Բանաձեւը ընդունուած է միաձայն:
Հրապարակուած հռչակագիրին մէջ Փարակուէյի Ծերակոյտը արձանագրած է, որ «կը ճանչնայ հայ ժողովուրդին Ցեղասպանութիւնը, որ գործադրուած է 1915-1923 թուականներուն Օսմանեան կայսրութեան մէջ, եւ կ՛ոգեկոչէ 100րդ տարելիցը` իբրեւ մարդկութեան դէմ կատարուած ոճիր»: Փաստաթուղթը ստորագրած են Ծերակոյտին անդամները:
