ՀՀ ոստիկանութիւնը հրապարակած է՝ ՀՀ Սահմանադրութեան փոփոխութիւններու հանրաքուէին մասնակցելու իրաւունք ունեցող քաղաքացիներուն նախնական ցուցակները, ըստ տարածքներու եւ հանրաքուէի տեղամասերու, կը հաղորդէ «Մետիամաքս»-ը:
Ոստիկանութեան տարածած հաղորդագրութեան համաձայն` ցուցակները փակցուած են հանրաքուէի տեղամասերուն մէջ: Անոնք տեղադրուած են նաեւ ՀՀ ոստիկանութեան պաշտօնական կայքին մէջ` ներբեռնելու հնարաւորութեամբ:
Հանրաքուէին մասնակցելու իրաւունք ունեցող քաղաքացիներու ցուցակներուն ծանօթանալու ժամանակ, եթէ անճշտութիւններ յայտնաբերուին, մինչեւ Դեկտեմբեր 1 զանոնք ճշգրտելու համար, քաղաքացիները կրնան դիմել լիազօր մարմինին` տարածքային անձնագրային ծառայութիւն կամ ոստիկանութեան անձնագրային եւ վիզաներու վարչութիւն:
Լիազօր մարմինը դիմումը ստանալէ ետք 5 օրուան ընթացքին, սակայն ոչ ուշ քան մինչեւ Դեկտեմբեր 2, բաւարար հիմքերու առկայութեան պարագային ընտրողներու ցուցակին մէջ պիտի կատարէ անհրաժեշտ փոփոխութիւններ կամ ուղղումներ` այդ մասին գրաւոր տեղեկացնելով դիմողին:
Ընտրացուցակներու ճշգրտման, անճշտութիւններու վերաբերեալ հաղորդումներ ընդունելու նպատակով երէկուընէ ՀՀ ոստիկանութեան անձնագրային եւ վիզաներու վարչութեան մէջ կը գործէ թէժ գիծ ծառայութիւն` 010-37-02-36 հեռաձայնով:
